Shillong, Nailar 04 : Ki Pulit ka West Jaintia Hills kila ioh kem ia 3 ngut ki briew kiba suba kynnoh donkti ha ka jingpyniap ia u rangbah ba 28 snem na Ialong.
Une u rangbah ba iap u kyrteng u El Dameshuliuh ba na Luti Tuber, ia kaba la lap ia ka met na Khliehriat, East Jaintia Hills District ha ka 31 tarik Naitung, 2026, ong ki Pulit.
Kane ka case kala sdang shai ha kajuh ka sngi hadien ka jingioh khubor ba kawei ka Maruti Alto K10 ba don u nombor ML05-AG-0265, lah ioh bat da ki Pulit ka Gumrah ha Cachar District, Assam ha ryngkat bad arngut ki briew.
Halor kane ka khubor, ka kynhun ki Pulit ka Phramer Traffic Cell kala hiar sha Gumrah ha ryngkat ka jingiatreilang bad ki Pulit ka Assam.
Ia kane ka kali bad ia ki arngut ki briew la wan ialam noh sha Meghalaya ban pynlong ia ka jingtohkit bad ban pyndep ia ki kam kat kum ka ain.
Hadien la lap ba kane ka kali ka dei jong une u rangbah ba iap, kaba la pynlong ia ki Pulit ban register case ha Jowai Polcie Station hapoh ki kyndon ka Bharatiya Nyaya Sanhita.
Haba pynshong nongrim ia ka jingtohkit, ki Pulit kila kem ia arngut ki nongshongshnong ka East Jaintia Hills ba kynthup ia u Dapdangkmen Paslein ba 26 snem uba dei na shnong Laskein bad u Samuel Lakai ba 25 snem uba dei na shnong Umkyrpong. Ia uba lai, u Dunivankmen Sutnga ba 26 snem na shnong Okhaidong, la kem ha ka step sngi Ba-ar.
Ia kine ki laingut la ialam tian bishar sha Iingkashari katba ki Pulit ki dang bteng ia ka jingtohkit halor kiei kiei kiba jia baroh kaba lam sha kane ka kam bymman bad ban lum shuh shuh ia ki sakhi satar.
Ka Tnad kala ai ruh ka jingkhublei ia ka jingkyrshan hapoh ka por kaba biang da ki Pulit ka Gumrah ha Assam.
