Nongstoin, Naitung 31 : Ka kynhun ki runar, kila thombor ia kawei ka Longiing ha ka step phyrngap ka sngi Thohdieng hapoh ka Shnong Porsohsat, West Khasi Hills, kaba lam sha ka jingiap jong u trai Iing bala 60 snem bad ka jingjah rngai ka para ba 18 snem bad u kurim.
Kat kum ka jingiathuh ki Pulit, kane ka jingjia kala jia ha ka por 2 baje mynstep bad kane ka longiing ba shah thombor ka dei jong u Bah Elbin Kharbani ba 60 snem bad ka kong Seldaris Kharsyntiew ba 68 snem.
Ki Pulit ki pyntip ba ha ka por 4 baje mynstep, kila ioh khubor na uwei u rangbah ka shnong Porsohsat Bah Khraw Kharsyntiew, ba pyntip ia ka jingshah thombor ka Iing u Bah Elbin ha kine ki runar ki bym lah ban ithuh kiba la wan rah da ki wait bad kiwei ki tiar pynmynsaw.
La iathuh baka para khatduh u Bah Elbin, kaba dang 18 snem ka rta, kala jah rngai bad u briew ba kala iashong iasah lang ruh ula jah lang.
Ia kine kiba shah shoh la pynkit noh sha Civil Hospital da ki bahaiing hasem bad la pyntip ba u Bah Elbin ula mynsaw jur na ki bynta ka khlieh bad don hapdeng ka jingbym tip briew katba ka kong Seldaris kala mynsaw na ka jingshah dung da ka tari bad la pynkynriah ia ka sha Shillong ban ioh ia ka jingsumar ba kham bha.
Ki Pulit ki iathuh ba hadien katto kate por, la pyntip ba u Bah Elbin ula khlad noh na ka jingmynsaw.
Ki Pulit kila register case halor kane ka jingjia bad ka jingtohkit mynta kala iaid shakhmat.
La pyntip ruh ba ki Pulit kila dep ban ithuh ia ki runar kiba donkti bad ka jingpyrshang ban kem ia ki, ka la iaid shakhmat.
