Guwahati, Naitung 31: U Myntri Rangbah ka Arunachal Pradesh Pema Khandu, ha ka sngi Thohdieng, u la khot ïa ka jingïatreilang kaba kham khlaiñ hapdeng ki 8 tylli ki jylla ka thaiñ shatei lammihngi, ban ïakhun pyrshah ïa ki jingma kiba nang jur ïa ki khynnah, kynthup ka jingshah khaii, ka jingpyndonkam bakla online, ka jingdih buaid, ka jingshongkha khynnah bad ki kam runar kiba ïaid ha ka thain khappud.
Haba plie ïa ka jingïalang kaba nyngkong eh jong ka North East State Commissions for Protection of Child Rights (SCPCR) Convention 2026 ha Tawang, u Khandu u la ong ba ka jinglong kyrpang jong ka thaiñ ha ka liang ka jaka bad ka imlang sahlang ka pynlong ïa ka jingïatreilang kaba donkam ban ïada ïa ki khynnah na ki kam runar kiba ju ïaid lait ïa ki pud ki sam jong ki jylla.
Haba batai ia kane ka jingialang kum ka “jinglong kaba kongsan ha ka histori,” u Khandu u la ong ba ka dei ka sien kaba nyngkong ba baroh ki State Commissions for Protection of Child Rights ha Northeast ki la iawan lang ha ka rynsan kaba iadei lang kaba la aiti kyrpang na ka bynta ka hok jong ki khynnah.
“Ka jingthew ba shisha jong ka jingsynshar kaba bha kam dei tang ha ka roi ka par ka ioh ka kot hynrei haduh katno ngi ïada ïa ki nongshong shnong kiba kham rit jong ngi,” u la ong, da kaba pynksan ba uwei pa uwei u khynnah u dei hok ban ïoh ïa ka jingim kaba lait na ka jingshah thombor, jingshah lehbeiñ, jingshah ban beiñ, ryngkat bad ka jingïoh ïa ka jingnang jingstad, ka jingsumar pang bad ka lad kaba ïaryngkat.
Haba pynpaw ia ki jingthmu jong ka Arunachal Pradesh ban iada ia ki khynnah, u Khandu u la ong ba palat 15,500 ngut ki khynnah kynthei ki la ioh jingmyntoi na ka Dulari Kanya Scheme, ha kaba ka jylla ka la bei tyngka palat T.38 klur ha ka jingkyrshan ia ki jingpule ba shalor. U la bynrap ruh ba palat 134 tylli ki prokram pynsngewthuh la pynlong hapoh ka Beti Bachao, Beti Padhao campaign, katba T.3.3 klur la mang ha u snem 2026-27 hapoh ka Girls Health & Hygiene Scheme sha palat 25,000 ngut ki nongïoh jingmyntoi.
U Myntri Rangbah ka Jylla ula kdew ruh ïa ka maternal and child welfare programmes, da kaba ong ba palat 38 hajar ngut ki longkmie ki la ïoh jingïarap hapoh ka Pradhan Mantri Matru Vandana Yojana, katba palat 1.8 lak ngut ki kynthei bad ki khynnah ki hap hapoh ka Saksham Anganwadi bad ka Poshan 2.0.
Ha kaba iadei bad ka jingiada ia ki khynnah, u Khandu u la ong ba palat 2,500 ngut ki khynnah kiba rit ki ioh jingkyrshan hapoh ka Mission Vatsalya, katba 2,479 ngut ki khynnah ki ioh jingmyntoi na ki sponsorship, foster care bad ka aftercare schemes ba ai jingiarap man la u bnai kaba T.4,000. U la pynpaw ruh ïa ka bynta jong ka 24×7 Child Helpline 1098, Women Helpline 181, bad ki One Stop Centre kiba treikam ha baroh ki 25 tylli ki district.
Da kaba khot ia ka jingiada ia ki khynnah kum ka jingkitkhlieh lang, u Khandu u la kyntu ia ki sorkar, ki skul, ki longiing, ki bor pynjari ain, ka tnad bishar, ki nongtrei ka koit ka khiah bad ki seng bhalang ban iatreilang ban pynthikna ia ka jinglong jingman kaba shngain na ka bynta ki khynnah.
U la pynpaw ka jingkyrmen ba kane ka jingialang kan pynkhlain ia ka jingiatreilang hapdeng ki jylla ha kaba ialeh pyrshah ia ki khynnah kiba jah bad kiba shah khaii, kan pynbha ia ka jingpyntreikam ia ki ain iada ia ki khynnah, kan pynsuk ia ka jingsam ia ki rukom treikam kiba bha tam, bad kan pynbha ia ki jingpynbeit ia ki jingma kiba mih online.
“Ia ka jingjop jong kane ka jingïalang yn thew ym da ka jingbun ki jingkren hynrei da ki jingpynbha kiba don jingmut ha ka jingim jong ki khynnah ha kylleng ka thaiñ Shatei Lam Mihngi,” ong u Khandu.
