Tura, July 30: Ka Garo Hills Autonomous District Council (GHADC) kala khynwin da ka jingmih ka jingkynnoh ba kala don ka jingpyndonkam bakla ia ka pisa, ka jingsoi thok bad ka jingpyrshang ban klun ia ka ram kaba T. 200 Klur ha ka sngi ba-ar jong ka dorbar lyiur.
Kane ka jingiakhluid kala mih ha ka kynta kylli jingkylli haba u MDC Rinaldo K. Sangma ula pan jingpynshai halor ka jingsiew ia ka T.23.60 lak na ka pisa jongka GHADC sha ka Lexi Corp LLP kaba na Delhi ha u snem 2025. Katkum ki jingtip kiba la buh hakhmat ka iingdorbar, kane ka kynhun kala iohpdiang T.20 lak bad hadien kane, sa ia ka T.3.60 lakh kum ka Professional Fees.
U Rinaldo ula buh jingkylli balei ia katei ka jingsiew kaba la pyndep kam shim la paw ha ka Budget Grant No. 12, kaba iadei bad ki Loans bad Grants, kala paw ba ym don eiei ne “Nil”, bad kynnoh ba katei kajuh ka kompani kala donkti ha kaban plie lad ia ka jingshim ia ka Loan kaba jan T.200 klur na ka bynta ka Council.
Haba jubab ha ka dorbar, u Deputy Chief Executive Member (CEM) u Stevie M. Marak ula wanrah ia ki minit jongka jingialang ka Executive Committee barim bad la kynnoh tyngeh pyrshah ia u Chief Executive Member barim u Albinush R. Marak bad ia u Deputy Chief Executive Member barim u Nikman Ch. Marak.
Haba iakren bad ki nongthoh khubor, u Stevie ula kynnoh ba ka EC kaba rim kala pyrshang ban buh bynda ia ka pisa tyngka jong ka Council ha ki pateng ban wan da kaba thmu ban shim sopsop ia ka ram.
“Lada kane kadei kaba la ioh ban iaid lyngba, ka GHADC kan mad ia ka jingsiew ia ka ram kaban kot haduh T.200 Klur khlem ka jingtip jong ka Council,” ula kam.
U Deputy CEM ula kynnoh ruh ba ia ki rekod jongka Executive Committee ruh lah dep ban pynduh noh. Ula kam ba ia ka kyrteng jongu ruh kala paw kum uba la iadonlang ha katei ka jingialang kaba la mynjur ia katei ka jingtyrwa, watla ym shim la don satia ha katei ka jingialang.
“Ngam shim la leit iashimbynta ha katei ka jingialang, hynrei ka kyrteng ka jong nga kala paw ha ka minit jong ka jingialang. Ngam donbynta eiei bad katei ka jingtyrwa ban shim ia ka Loan ne ha katei ka jingialang. Ngan sa ujor ia ka forgery case ne ka jingsoi thok ia ka kyrteng jong nga” la ong u Stevie ha ki nongthoh khubor.
Ha katei ka jingiakren, u Deputy CEM barim u Nikman Ch. Marak la kynnoh ba ula pynpaw ba katei ka company kadei kaba la shimkhia shimet da u CEM barim u Albinush R. Marak bad kam dei satia ka kompani ne ka kynhun jongka GHADC.
Haba kyntait ia ka jingkam, u Stevie ula pyni ia ki kot ki sla hakhmat jong ki lad pathai khubor da kaba kdew ia ki kyndon ba “U CEM ka GHADC u Albinush R. Marak bad Deputy CEM kila tyrwa kum ki Director kiba nyngkong jongka company na ka bynta jongka Council.”
Ula pynpaw ba ki kot ki sla kila kdew ba kala don ka jingpyrshang ban pyniadonbynta lang ia ka District Council bad ka kompani shimet, ia kaba la niew kum ka jingkam hakhmat ka ain ia kaba ym lah ban iada.
“Ka District Council kam dei ka kompani shimet. Lada kadei ka kam khaii pateng shimet, balei ia ka T. 23.60 lak na ka pisa jongka Council kala siew ia katei? Mano ba la aibor ban siew ia katei?” ula buh jingkylli.
U Stevie ula kynnoh shuh shuh ba ia ka pisa paitbah la pyndonkam bakla bad dawa ba dei ban phah pynphai noh ia katei ka T.23.60 lak na u CEM barim bad u Deputy CEM barim.
Kane ka jingkynnoh kala pynmih ia ka kynrum kynram bad ia ka jyrsieh kaba heh ha ka GHADC, ha kaba ki dkhot ka Liang Pyrshah kila dawa ia ka jingkitkhlieh halor ka jingsiew sha ka Lexi Corp LLP, ka jingtyrwa ban shim ia ka ram kaba T. 200 Klur bad ka jingkynnoh ba kala don ka jingleh thok ia ki rekod jongka Executive Committee.
U Deputy CEM ula pynbna ban shim da ki lynti jong ka ain halor kitei ki jingkynnoh soi thok ia ka kyrteng, ia kane ka mat la khmih lynti ba kan long ka mat kaban iatai sani ha kane ka dorbar lyiur.
 kala khynwin da ka jingmih ka jingkynnoh ba kala don ka jingpyndonkam bakla ia ka pisa, ka jingsoi thok bad ka jingpyrshang ban klun ia ka ram kaba T. 200 Klur ha ka sngi ba-ar jong ka dorbar lyiur.){kind=link}