Shillong, Risaw 07 : U Myntri barim ka Jylla Bah JA Lyngdoh hynne ka sngi thohdieng, ula pynpaw ia ka jingartatien ba ka BJP kan nang jop bun seat ha ka elekshon MLA-2023 ha Jylla.
“Lada u Bah Sanbor Shullai u iai neh beit bad ka BJP khlem pep un jop beit hynrei kiwei te ngam tharai ba kin jop” ong u Bah JA Lyngdoh uba la leit pyniasoh biang sha ka Congress haba iakren bad ki nongthoh khubor.
“U Bah Sanbor lada u iakhun naka BJP ne na kano kano ka party, la thikna ba shispah na ka shispah ba un jop beit namar ha u, ka party kam don jingmut. Ki paidbah ki vote ia u Bah Sanbor kum u briew” ula bynrap.
U Bah JA Lyngdoh uba la bat teng kum u Vice President ka BJP shuwa ka elekshon MLA 2018, ula sngap jar jar halor u MLA ka BJP na Pynthorumkhrah Bah A.L.Hek.
Haba kylli shaphang u Bah Hek, une u Myntri sorkar barim ula ong ba kan shong ha ka jinglah khring vote jong u pyrsa u Bah Rocky Hek u ban iakhun pyrshah ia u na ka ticket jong ka NPP.
“Kam dei shuh kaba suk ia u Bah A.L.Hek. Kan dei ka jingiakhun kaba tasam bha namar u Pyrsa, uba ju dei u briew ba hakti hakjat, un iakhun pyrshah ia u na ka NPP” ula bynrap.
