Shillong, Niatung 24: Ka lympung State-Level Subroto Mukherjee Cup Football Tournament 2026 kala sakhi ka jingialehkai kaba itynnad ha ka semi-final jong ka Under-15 Boys, Under-17 Boys bad Under-17 Girls kiba la long ha SSA Stadium bad MFA Turf, Polo.
Ka State-Level Subroto Mukherjee Cup bala pynlong da ka Directorate of Sports & Youth Affairs, ka long shi bynta jong ka jingpyrshang ka Sorkar Jylla ban wad bad pynroi ïa ki sap ialehkai hapoh ka jingïalam jong u Myntri Rangbah ka jylla Conrad K. Sangma, da ka jingthmu ban pynkhreh ïa ki samla ka Meghalaya ban ïakhun ha ki kyrdan National bad International.
Ha ka U-15 boys, ka North Liberty Higher Secondary School na West Jaiñtia Hills ka la jam shaka phainal da kaba jop da 2-0 ïa ka Little Star Higher Secondary School jong ka Eastern West Khasi Hills.
Ki kol kiba la thep da u Malcolm Nongbsap ha ka minit kaba 19 bad u Man-i-khan Kyndiah ha ka minit kaba 35 ki la biang pura iaka North Liberty ban jam shaka phainal.
Kawei pat ka jingïalehkai semi phainal hapdeng ka Umpohliew Jingtip Higher Secondary School jong ka East Khasi Hills bad ka Step by Step Secondary School jong ka East Jaiñtia Hills ka long ka jingialehkai kaba itynnad ha kaba ym shym la lah ban thep goal.
Iaka jingiakhun la pynkut noh daka penalty ha kaba ka Umpohliew Jingtip ka la jop da 3-2 kol ban buh jaka haka phainal pyrshah ia ka North Liberty.
Ha ka jingiakhun U-17 Boys, ka Wapung Higher Secondary School na East Jaiñtia Hills ka la jop ïa ka Dapboklang Giri Memorial Secondary School jong ka West Khasi Hills da 5-0 kol lyngba ki goal bala thep da Kamwamutmi Dkhar bad Jeffarson Phawa kiba la ioh ban thep mar 2 goal ha ka minit kaba 20 bad 69 bad ha ka minit kaba 55 bad 61, katba u Donbor Dkhar u la thep biang ha ka minit kaba 28.
Ka O.M. Ka Roy Memorial Higher Secondary School jong ka East Khasi Hills ka la lah ban ioh thep bun tam ki goal ha kaba ka la pynliem ia ka Bajengdoba Higher Secondary School na North Garo Hills da 7-0 kol.
U Lamshai Jana u la la ioh hattrick hadien ba ula thep ha ka minit kaba 7, 21 bad 58 minit, u Ebenezer Sun u la thep ar kol ha ka minit kaba 9 bad kaba 23, u Jonathan Kharbani bad u Deiwamut Syiem ha ka minit kaba 70 bad 72.
Ha ka jingialehkai kaba la long ha madan SSA, Polo, ka jingïakhun semi phainal jong ki khynnah kynthei hapoh 17 snem ruh ka la ïohi ïa ka jingïakhun kaba tang shi liang ha kaba ka North Liberty Higher Secondary School ka la pynliem ïa ka Lurmangkara Secondary School jong ka West Khasi Hills da 5-0 kol.
Ka Receive Ksoo ka la ioh ban thep ha ka minit kaba 3, bud sa ki kol kiba la thep da ka Saphika Pyrtuh, ka Baiarbha Nongrum, ka Peacefully Pohphlet bad ka Elizabeth Thanglai.
Ka Little Star Higher Secondary School na Eastern West Khasi Hills ka la ïoh ban buh jaka haka phainal daka ba jop da 2-0 ïa ka Nongjri Presbyterian Secondary School jong ka Ri-Bhoi.
Ka Genefa Myrthong kala ioh thep haka minit ba 45 bad ka Bansara Rynsiang ha ka minit kaba 64.
Ka Final kan long haka 25 tarik Naiting ha kaba ka North Liberty kan ïakhun pyrshah ïa ka Umpohliew Jingtip ha ka Under-15 Boys final, katba ka Wapung kan ïakhun pyrshah ïa ka O.M. Roy Memorial haka Under-17 Boys.
Ha ka Under-17 Girls final, ka North Liberty kan ïakhun pyrshah ïa ka Little Star.
