Nagaland | Pynsangeh ka DoNER haduh 12 tylli ki project ba T.100 klur namar ka jingpynslem

Kohima, Naitung 23: Ka Ministry of Development of North Eastern Region (MDoNER) ka la pynsangeh haduh 12 tylli ki projek ha Nagaland kiba shongdor ₹100.28 klur, da kaba kdew ïa ka jingpynslem ban pyntreikam, wat haba ka jylla ka dang bteng ban pyntreikam ïa ki 93 tylli kiwei pat ki projek ba la bei tyngka da ka sorkar pdeng.

Ki jingtip ba thikna naduh u bnai Lber 2026 ki pyni ba ki 12 tylli ki projek ki don ïa ka jingmang pisa kaba long ₹100.28 klur, ha kaba ₹60.30 klur la dep pynlut shwa ban khang ïa ki skhim.

Napdeng ki projek ba heh ba la weng noh ki long jong ka Phase-I jong ka New High Court Complex ha Kohima, ka HFO Thermal Power Plant kaba 23 MW ha Dimapur, bad ka surok Noklak-Thonoknyu lyngba ka Sanglao.

Ka ministry ka la ong ba ki projek kiba sahkut ha ki por ba la khang noh halor ka nongrim “kumba ka long, hangno ka don” lane “ka jingpynphai biang kaba pura” hadien ba la iamir jingmut bad ka sorkar Nagaland.

Ka jingbishar bniah ka la lap ruh ba 26 tylli ki projek kiba hap hapoh ka skhim NESIDS-OTRI, NESIDS-Roads bad NEC ba la buh kham mynshwa kum ki projek kiba don ha ka jingeh. Khatriew tylli na kine ki don hapoh ka prokram NESIDS-OTRI ha kylleng ki tnad trei kam kynthup ïa ka Law & Justice, Public Works, Health bad ka School Education, ryngkat bad ki katto katne ki projek kiba la sdang naduh u snem 2003.

Wat hapdeng ki jingshah pynphaidien, ka Nagaland ka dang bteng ban don 93 tylli ki projek kiba dang ïaid shakhmat ba la bei tyngka da ka MDoNER, kaba long kaba saw kaba heh tam napdeng ki jylla jong ka thaiñ shatei lammihngi. Naduh ba la sdang ia ka, ka ministry ka la mynjur ia 435 tylli ki projek kiba shongdor ₹5,337.93 klur na ka bynta ka jylla.

Ha ka coordination meeting bad heh heh ophisar ka MDoNER, u Principal Secretary bad Development Commissioner u Y. Kikheto Sema u la bthah ia ka tnad ban pynsted ia ka jingpyntreikam, ban pynkhlain ia ka jingpeit bniah ia ki projek bad ban pynthikna ban aiti ia ki utilisation certificates ha ka por kaba biang.

Ki heh ophisar ki la ban jur ruh ba baroh ki jingtyrwa thymmai dei ban pynpoi lyngba ka tnad Planning ban pynbha ia ka jingiatreilang.

Ia kane ka mat jong ka jingpynslem ia ki projek la pynpaw kham mynshwa da u Myntri Rangbah ka jylla u Neiphiu Rio ha ka jingialang jong ka NITI Aayog Governing Council, ha kaba u la kdew ia ka jingpynslem kaba hynriew haduh shi phew bnai ha ka jingmynjur ia ki Detailed Project Reports (DPRs).

U Rio u la kyntu ba ka aiom treikam kaba paka jong ka Nagaland ka long tang haduh hynriew haduh hynniew bnai namar ka jinglong jingman ka suinbneng, kaba pynlong ïa ki jingpynslem slem kum ka daw bah jong ka jingkiew dor bad ka jingpynslem ban pyntreikam ïa ka projek.