Shillong, Risaw 07 : U Myntri kam Pohiing bad Pule Puthi ma Lahkmen Rymbui hynne ka sngi thohdieng ula ong ba um pdiang satia ia ka jingdawa ban hiar shuki noh kum u Myntri Sorkar.
“Ka kyrdan ha nga ka dei kaba hadien. Ngan shakri ha kano kano ka kyrdan ruh hynrei ban ong ia nga ba ngan iehnoh kam dalade, ngam ym iehnoh satia…” ong u ma Lahkmen haba iakren bad ki nongthoh khubor.
U ma Lahkmen ula pynpaw ia kane halor ka jingdawa jong kiba bun ki kynhun kynthup ki Nongialam na ka United Democratic Party (UDP) kaba mih na ka jingshah kawang bomb pynsat khmat jong ki nonghikai contract ba iakhih hynnin ka sngi palei.
U ma Lahkmen ula ong ba un ym hiar shuki satia namar kaei kaba jia kam dei satia kaba leh ma u. “Balei ba ngan hiar shuki? Nga wan hangne ym ban kynran dien noh” ula ong.
Haba kyntait ba la pynlong langknia ia u, u Myntri kam Pohiing ula ong “Ngi don hangne ban iatreilang kum ka Sorkar ha kaban pynbeit ia ki jingeh jong ka Jylla. Kam dei kumba phi mut ba long langknia hynrei ka lah ruh ban dei, ta ka daw ngi la iatreilang bad kaei kaba ngi lah ban leh ngin leh hynrei ia kaei kaba ngim lah ban leh, ngin kren beit ba ngim lah ban leh” ula ong.
Halor ka jingkynnoh ka AITC ba ka Sorkar MDA kala leh tohmet ia ki nonghikai ba iakhih, u ma Lahkmen ula ong “Ngim shym la leh tohmet iano iano ruh. Naduh ka sngi ba nyngkong ngi lah kren shai ba ngin hap ban bud ia ki kyndon bala buh da ki bor khmih bad ngi la aipor ruh..Ngi la pynjlan ia ka rta bad mynta ka sorkar kala ailad biang ia ki ba kin iakhun ia ka eksam…ta ka daw ka jingkylli ba ngi leh tohmet kam mih satia”.
