Shillong, Naitung 22: Ka BJP kala leh kiar ban pynpaw eiei halor ka jingsaphriang ka jingpynsngew ha ka rynsan Social Media bad u Nongaiktien u Arnab Das ula ong, ba ka seng kam lah ban pdiang bad kitei ki jingkynnoh kidei kiba thok.
U Arnab Das ula ong, ba ka seng kala dep iakren pynbeit bad u President ka Yuva Morcha ha kaba ula kyntait ban pynmih ia kano kano ka jingpynsngew ne jingkynthoh.
Ula maham ban shim ba ki jingpynsaphriang ia ki jingthoh ha ki rynsan Social Media da kaba kdew ba ha ki por kiba la dep, kala don ka jingleh thok ne ‘Hack’ ia ki ‘Account’ jong ki nongialam ka jylla.
“Ka jingphah kyrwoh ka seng kadei kaba la iaid da ka lynti bad ki lad kiba dei. Ngi kyntait jur ia kano kano ka jingkynthoh ka bym don ka jingkitkhlieh kaban kynthuplang ia ngi” la ong u Das.
Ka BJP Meghalaya kala ong, ba ka burom ia ka hok jong ki samla pule kiba pynlong ia ka jingiakhih ha Jantar Mantar ha kaba iadei bad ka mat jong ka NEET. Hynrei kala kynnoh ba kiwei pat ki seng saiñ pyrthei ban pyrshang ban leh politik bad ban knieh nam bad burom ia katei ka jingiakhih.
Ka seng kala pynrem jur ruh ia ka jingthombor ki pulit ha ka por ba pynlong ia katei ka jingiakhih bad kala kyntu ia ki samla pule ba kim dei ban ailad ia ki seng saiñ pyrthei ban shimkabu ia katei ka jingjia.
U Das ula kynthoh jur ruh ia ka seng Congress kaba pyrshang ban rung sha ka iingsah jong u Myntri Rangbah duh ka ri bad ong, ba katei kadei ka jingpynkheiñ bad ka pynmih ruh ia ki jingkylli halor ka jingshngain jong u Myntri Rangbah duh ka ri.
Ula pynapw ruh ba ka lah don ruh ka jingiaknieh bor hapdeng ka seng AAP bad Congress ban ialam nakhmat ia katei ka jingiakhih.
“Ka BJP kam kyrshan ia ki kam ia umsnam ha kano kano ka rukom ruh. Ngi kwah ba katei ka jingiakhih kan long kaba jai jai” ula ong.
Halor ka jinglait tuh ki jingkylli ka eksamin NEET, u Das ula ong, ba ka Sorkar Pdeng kala dep ban kem haduh 13 ngut bad u Myntri Rangabh duh ka ri ula pynthikna ba kan don ka jingwanrah ia ka jingkylla kiba kongsan.
“Namar ka jinglong jingman bad ka jingheh jong ka ri bad ka jingiar ka rukom treikam, kum kitei ki jingkylla kin shim por. U Myntri Rangbah duh ka ri ula iengskhem ban ai ia ka lawei kaba thikna ia ki samla pule ki jong ngi lyngba ka jingwanrah ia ki jingkylla kiban iaineh ha ka pule puthi” ula bynrap.Ki paidbah ka Hima Langrin kila dawa ba u Nongtei Sing Syiemiong udei ban hiar shuki mardor kum u Syiem ka Hima Langrin bad kila dawa ruh naka KHADC ba kadei ban burom iaka sur jong ki khun ki hajar ka Hima Langrin baroh kawei.
