Shillong, Naitung 22 : U Symbud Myntri Rangbah Bah Sniawbhalang Dhar ha ka miet sngi Ba-ar ula ong ba ka jingskhem jong ka Sorkar Meghalaya Democratic Alliance (MDA) ba ialam ka National People’s Party (NPP) bad ka jingpynleit jingmut ha ka synshar khadar ha ka jaka ka iaknieh bor, kala pynlah ia ka Meghalaya ban kynjoh ia ka roi ka par kaba bun shah ha kine ki phra snem bala leit noh.
Haba kren ha ka rynsan ialap elekshon ha Ummulong Madan Khawang ban pan jingkyrshan ia u kyrtong ka NPP ban iakhun ia ka elekshon shiteng samoi ka Shillong Lok Sabha Dr DRL Nonglait, u Bah Sniawbha ula ong ba ka Sorkar ba ialam ka NPP kala lahban ai ia ka jingshakri namar ki 32-33 ngut ki MLA jong ka, kila iatreilang khlem ka jingiaknieh long nongialam.
“La palat phra snem mynta ngi la synshar ia ka Jylla. Watla ngi don 32-33 ngut ki MLA, ngim ju iashrut bad don ka jingiapher jingmut hapdeng jong ngi. Ngim don por ban iaknieh bor namar ngi bunkam ban trei na ka bynta u paidbah” ong u Bah Sniawbha.
Ula pyniapher bad ki Sorkar kiba la leit noh haba kynnoh ba ki Myntri Rangbah kila kylla man ka 7 lane 8 bnai.
“Ta ka daw ngi don ia ka jingiatylli bad ka jingiadei kaba iajan bad dei ta ka daw ngi la lah ban ialam ia ka Jylla sha kawei pat ka kyrdan” ula bynrap.
U Bah Sniawbha ula pynksan ia ka Sorkar pyrshah ia ki jingkynthoh halor ka jingshim ram, da kaba ong baroh ki ram ki dei kiba la shim hapoh u pud bala buh da ka Finance Ministry bad kaba iaid kat kum ki rule bad ki kyndon bala buh.
“Ha u 2018, ka mang tyngka ka Jylla ka long T.9000 klur. Mynta kala kot ia ka T.30,000 klur. Ka daw ka long ba ngi don ia ki nongialam kiba trei shitom” ula ong.
Ula kdew ia ka jingpynshai ba dang shen jong ka Myntri Pla Tyngka ka Ri ba ka ram jong ka Meghalaya ka long hapoh u pud bala buh bad pynpaw ba bun ki ram bala pynbna da u Myntri Rangbah ki dei kiban siew pat da ka Sorkar India.
“Kam mut satia ba tang namar ba phi don ha ka bor phi lah ban leh kat kaba mon. Kano kano kaba ngi leh ki dei kiba hap iaid kat kum ki rule bad ki jingteh kyndon” ula ong.
U Bah Sniawbha ula iathuh ia ka jingpynlut haduh T.10,000 klur ha ki surok-T.4,600 klur ban pynbha ia ka surok ba 3,400 Km bad T.5000 klur na ka bynta ban shna ia ki surok thymmai ba 600 km.
Ula iathuh ruh ba u Myntri ka Sorkar Pdeng Nitin Gadkari ula kular ban ai biang ia ka song pisa sa T.39,000 klur ia ka Meghalaya bad u Myntri Rangbah Duh ka Ri un sab uh ia u mawnongrim shen jong ki project ba T.21,000 klur, ka surok Four Lance ba 166 Km na Umroi sha Ratacherra.
U DyCM ula ther ruh ia ki seng sain pyrthei kiba don ha ka liang pyrshah kiba iai kynnoh bamsap khlem da lah pat ban ai ia ki sakhi ne pynshisha.
“Nga sngew synei ia kiwei ki seng sain pyrthei kiba lapmiet ban pyrta ‘bamsap’ ‘bamsap’ man ka sngi. Lada phi sngew kumta, ai ia ki sakhi. Hynrei ki briew ba lui lui kila shah ialam bakla da kum kine ki jingkynnoh ba khlem nongrim” ula ong.
Ula pynkut da kaba kyntu ia ki nongthep vote ban kyrshan ia u Dr Nonglait ha kane ka elekshon shiteng samoi ban wan ka Shillong Lok Sabha.
 ba ialam ka National People’s Party (NPP) bad ka jingpynleit jingmut ha ka synshar khadar ha ka jaka ka iaknieh bor, kala pynlah ia ka Meghalaya ban kynjoh ia ka roi ka par kaba bun shah ha kine ki phra snem bala leit noh.){kind=link}