Shillong, Naitung 21 : Ka Sorkar Jylla kala sdang ia ka jingiasyllok bad ki kynhun bapher bapher na ka bynta ka jingtyrwa ban seng ia ka Shillong Drinking Water and Sewerage Board, ong u Myntri ka Tnad PHE Marcuise N Marak ha ka sngi Ba-ar haba pyntip ba ka jingialang ba nyngkong ka long kaba sngewtynnad bha.
Kane ka jingialang syllok ba long ha ka sngi Nyngkong ka dei kaba la wan iashimbynta da ki Heh Ophisar na ka Tnad PHE, Tnad Urban Affairs, Shillong Municipal Board, ki Rangbah Shnog na kylleng ki shnong ka sor Shillong.
U Marak u pyntip ba ka jingialang kala iakren halor ka draft Shillong Drinking Water and Sewerage Act, 2026 kaba ka Sorkar kala jer kum ka “Jal Board”.
“Ngi lah dep shna ia ka Act. Ngi la iasyllok bad ki kynhun bapher bapher bad ynda dep kane, ngin sa jam shakhmat” ula ong.
Kat kum ka jingong u Myntri, ki Rangbah Shnong kila pdiang ia ka jingtyrwa.
“Ki Rangbah Shnong kila pynpaw ia ka jingkmen. Ngi la aiti ha ki ia ka draft, kumno ba kan treikam bad ki jingtyrwa ban pynkylla ha ka rukom pyniaid kam” ong u Marak.
Ka sienjam ba bud, u bynrap, ka kynthup ia ka jingiasyllok shuh shuh bad ki nongialam bala kham rangbah, u Myntri Rangbah bad Symbud Myntri Rangbah ka Jylla, ka ban sa pynbud pat da ka jingmynjur ka Kynhun Myntri bad sa wanrah ha Iingdorbar Thaw Ain ka Jylla.
