Manipur | Kem ka NIA sa 2 ngut ki briew ba suba donkti ban pyniap ia 6 ngut ki Naga

Imphal, Naitung 18: Ka kynhun National Investigation Agency (NIA), ki Pulit ka Manipur bad ki CRPF ha ka sngi saitjaiñ ki la kem sa arngut ki briew ba shah kynnoh rahbor bad pynïap ïa ki 6 ngut ki Naga ha Manipur.

Kiba la shah kem halor kane ka jingjia kala kot mynta sha ka 4 ngut.

Kane ka jingkem kala wan jia hadien 8 sngi ba la sdang tohkit ïa katei ka kam kaba la paw bha, kaba la pynmih ia ka jingbitar kaba jur ha kylleng ki jaka ba sah ki Naga.
Kine ki arngut kiba la shah kynnoh ki dei kiba la tip kyrteng kum u Lungoulal Vaiphei bad u Lunminthang Sitlhou bad ka kyrteng sin kum u Jack bad baroh arngut ki dei ki nongshong shnong jong ki shnong kiba hap ha ka Kangpokpi District.

Haba pynthikna ia katei ka jingshah kem ha ka post ha ka X, ki pulit ka Manipur ki la iathuh ba la kem ia kitei ki arngut ha ka 18 tarik u Naitung kum shi bynta jong ka jingtohkit kaba dang iaid shakhmat halor ka jingshah rahbor bad jingshah pyniap jong ki 6 ngut ki shynrang Naga.

“Ka jingpyrshang kaba kham bniah ka dang iaid ban kem ia kiwei pat ki briew kiba don jingiadei bad katei ka case,” la ong ki pulit.

Kine ki 6 ngut ki Naga ki la shah rahbor ha ka 13 tarik u Jymmang katba ki dang wan phai na ka jingkhawai shongkurim ha Kangpokpi district. La lap ïa ki metïap jong ki najan ka shnong Leilon Vaiphei ha ka 10 tarik u Jylliew, kaba la pynmih ïa ki jingïakhih, ka jingkhang dam bad ka jingthang mombiti ha kylleng ki jaka ba bun ki Naga, kynthup ha Dimapur bad Shillong.

Ka jingleh kaba khatduh, ka long hadien ka jingshah kem ki shi shijur, u Pradip bad ka tnga jongu, ka Ayinghi, na kajuh ka shnong Kuki, ha ka distrik Kangpokpi, ha ka 10 tarik Naitung.Ïa kine ki arngut, la kem ha ka por ba ki nongtohkit, ki la batai kum ka “jingtreikam kaba thikna” kaba pynshong nongrim ha ki jingtip ba lah ban ngeit.

Ki nongtohkit ki la iathuh ba ka jingpyrshang ka dang iaid shakhmat ban wad bad kem ia kiwei pat ki suba donkti ha ki kam pyniap briew.