Shillong, Naitung 13 : U Myntri Rangbah ka Jylla Conrad K Sangma ha ka sngi Nyngkong, ula kular ban leh da kaba tyngeh pyrshah ia kito kiba donkti ha ka jingjia Lapalang kaba la shim ia ka jingim ki san ngut ki nongtrei bylla, bad ong ba ka Sorkar ka dang bishar ia ki lad ki lynti ban ai jingkyrshan ia ki longiing ki lanot.
Haba kren sha ki nongthoh khubor, u Conrad ula ong ba ki Rules kila don bad kiba pynkhein ia ki kyndon ain kin nym ioh satia ia ka jingmap.
“Ngin pynshitom ia kito kiba leh ia kane. Ki don ki rules bad ki kam kiba la khang. Ki briew ki bym bud ia kine ki jingpyrrkhing kila pynkhein ia ka ain, pynkhein ia ki rules, bad ngin leh da kaba tyngeh pyrshah iaki” ong u Conrad.
U ong ba ki lanot ki dei kiba wan na ki longiing kiba duna ka jingioh bad ka Sorkar ka dang bishar ia ki lad ki lynti ban ai jingiarap song pisa.
“Ngi dang bishar, ki don katto katne ki jingdonkam ba hap leh namar baroh ki dei kiba wan na ki longiing kiba dun aka jingioh, kito kiba khlad. Kumta, ngi dang khmih ia ki lad ki lynti ba kumno ngin lah ban ai jingiarap ia ki” ula ong.
U Conrad ula bynrap ba ula ioh pdiang ia ki jingkyrpad na ki nongtrei ka party ban ai jingiarap ia kine ki longiing.
“Nga la ioh pdang ia ka shithi hynnin ka sgi na ki katto katne ki dkhot ka Party NPP, ka Nongthymmai Unit- bad wat na kiwei ki Unit ruh kiba dei na ki constituency bapher bapher. Kumta baroh ki unit ka party ha ki constituency kila thoh shithi sha nga” ula ong.
U Myntri Rangbah ula pynpaw ba ki kyndon ka Disaster Management ba don mynta kim kynthup satia ia kum kine ki jingjia, hynrei ula kular ba ia ka rai yn sa shim haba pyrkhat lem ia ka longiing jong kine ki lanot.
San ngut ki nongbylla kila iap namar ka jingioh ring mynsiem da ka tdem generator katba ki dang pump ia ka um na ka pung um ha Lapalang, Shillong.
