Shillong, Naitung 12: Ka Dream Elite Pre-Season Summer Basketball Camp 2026 kala kut noh ha ka sngi Saitjain ha Pearly Dew School, Jaiaw, ha kaba u Director ka DREAM u Bah Francis Kharshiing ula kyntu ia ki nongialehkai kiba dang khynnah ban shimkhia iaki kam ialehkai ban long kiba khlain, ba koit ba khiah bad kiba lait na u droks ha ka lawei ka jongki.
Ia kane ka Basketball Camp ka pynlong da ka DREAM bad ka Dubakh Sports Pvt Ltd bad la kyrshan da ka Department of Social Welfare, ha kane ka jingai jinghikai kaba 2 taiew, kila don palat 100 ngut ki nongialehkai na kylleng ki bynta jong ka Nongbah Shillong bad ki jaka kiba marjan kiba la wan ban iashimbynta ha kane ka jingiakob watla kala don ka jingpynthud na ka jingjaw slap.
Haba ai jingkren, u Bah Francis Kharshiing ula ong “Nga pynshlur ia ki nongialehkai kiba dang khynnah ba phi dei ban don ia ka jingangnud kaba heh, ban long kiba ryntih bad kiba don akor bad ban pyndonkam ia ki jingialehkai kum ka lynti iaid ban long kiba koi tba khiah bad ka lawei kaba donjingmut”.
Ula pynthikna ruh ba ka DREAM ka iengskhem ban pynkup bor ia ki samla bad ban ialap ha ka jylla Meghalaya ban lait na ka jingngop ha u droks.
Ia kane ka kyrwoh la pynapw ruh ha ka jingak drama lyngkot kaba la iashimbynta da ka kynhun jong ka DREAM hapoh ka phang: “Be the Generation that Says No to Drugs. Prevention is Power.”
U Dr Tosanlang Kharsati u Principal jongka Pearly Dew School ula ai ka jingkren pdiang sngewbha, u Bah Ethan Alrico Ryntathiang u MD jongka Dubakh Sports Pvt Ltd, ula ai ki kyntien khublei, katba ka Barihunlang Wankhar kaba long ka Headmistress jongka Emjay Secondary School, kala iaroh ia kane ka sienjam bad kyntu ia ki khynnah pule ba kidei ban nang ban bynta ia ka por ka jongki hapdeng ka jingpule bad ka jingialehkai.
Baroh kine ki nongiashimbynta kila ioh pdiang ia ki sertiphiket, ka camp T-shirt bad ka bam.
