Ka “Rikynti ka Ri-lum Khasi”- Ka jingialeh laitluid u Khasi ban rakhe ha Jaiaw

Shillong, Naitung 13 : Ka Sangeet Natak Akademi, ryngkat bad ka Riti Academy of Visual Arts, kin pynlong ia ka sawangka ‘Rikynti Ka Rilum Khasi’ lane Virasat – The Eternal Hills, ban rakhe lyngkhuh snem ia ka jingrwai ieitri “Vande Mataram” ha iing Dorbar Jaiaw Shyiap Lumpyllon, Shillong, ha ka 15 Naitung 2026, naduh 6:00 baje janmiet.

Ka sawangka ka dei halor ka khana pateng shaphang ka jingialeh laitluid naduh mynnor haduh mynta ka ba kynthup ia ka jingiakhih Jylla Rilum, ka jingiakhih jong ki Dorbar Hima bad ki Syiem pyrshah ia ka sorkar Bilat bad ka jingiakhun jong u rangbah J J M Nichols Roy ha ka saiñdorbar ia ka riti synshar ka Ri India lane kata ka Constituent Assembly.

Ia kane ka sawangka la lamkynto da u Phrangsngi Wahlang bad la thoh da u Raphael Warjri ka ba iathuh khana shaphang ka jingialeh laitluid lyngba ki ryta ha ka Ri Khasi naduh mynnor haduh mynta.

Ka sawangka la pynlong ia ki ktien ba iakren ki tyngshop puron da ki sur phawar ba kynud katkum ka jingdawa jong ka khep ba sngewsih ne bakmen, ba jarjar ne ba risa kynhoi ban kham snah ka rukom ialeh ki tyngshop puron.

Ka sawangka ka long da ka rukom ba iathuh khana u kparad ia la ka khun ksiew ha sawdong ka lyngwiar dpei bad ba ki tyngshop puron pat ki sa ia lehkai katkum kata ka khana ba iathuh u tymmen ia la ka khun ksiew.

Ka rukom iathuh khana ka long ka ba myllung bad rhem mynsiem ban sngap bad khmih ki nongpeitkai ka ba lah ban pynkyndeh dohnud ha ba shahshkor ia ki sur phawar bad ki jingrwai ba tympang.

Ka khana ka sdang da ka jingialeh ban ioh jylla Rilum bad ka kut da ka khana shaphang u Tirot Sing Syiem bad ka Dorbar Hima Khatsawphra ha ka ba ki khlawait bad ki khyndaibahryntieh ki la iakhun pyrshah ia ki shipai phareng.