Jowai, Shillong, Naitung 9: U Myntri Rangbah ka Assam u Himanta Biswa Sarma hynne ka sngi Palei, ula wan sakhi ia ka lehniam Behdeinkhlam ha rilum Jaintia kum u kongsan bad ula ai khublei bad kitbok ban don ka jingsuk bad ka jingiadei paralok na ka liang ki paidbah ka Jylla Assam sha ki padtbah ka Jylla Meghalaya.
Haba iakren bad ki nongpathai khubor, u Sarma ula ong, ba ula wan ban iashimbynta ha ka jingrakhe ia ka jinglehkmen kum shi bynta ban pynkhlain ia ka jingiadei hapdeng kine ki artylli ki Jylla.
“Nga lah ai ia ka kyrwoh kaba bha na ka liang ka Jylla Assam sha ki hynmen ki para ka Meghalaya bad khamtam eh sha ki hynmen ki para kynthei bad shynrnag ka Jaintia Hills. Nga ai khublei bad kitbok kyrpang bad nga duwai ia ka jingjop jong kane ka jingrakhe bad jinglehkmen” ula ong.
U Myntri Rangbah ula kren ruh halor ka jingshem ka jongu halor kane ka jinglehkmen bad pynpaw ia ka jingangnud ban iai bteng ban wan iashimbynta ha ki por kiban wan.
“Ngan sa wan biang bad ngan ia snohkti lang ha kane ka jingialehkmen bad ngan leit ruh ban kynthih ha katei ka pung. Ngan sa wan beit” ong u Sarma.
Ha katei ka jingrakhe, la ai sngewbha ia ka waitlam tynrai sha u Myntri Rangbah ka Assam, kaba la thoh ia ki kyntien, “Ka waitlam kaban mait ia ka lynti jong ka jingsuk”.
U Sarma ula ioh ban sakhi ia ka jingpyni tynrai ia ki 13 tylli ki rot ne ki tableau kiba la shna kyrpang ha Aitnar kum shi bynta jong ka jingrakhe ia ka Behdeinkhlam.
Kane ka jingrakhe, kadei kaba long man la ka snem ha ka rilum Jaintia bad kadei na ka bynta ban rat dyngkhong ia ka khlam jingpang bad na ka bynta ka bha ka miat bad ka roi ka par jong ka jaidbynriew.
Kane ka jingwan u Sarma kadei ha ka por ba ka Assam bad Meghalaya ki dang iatreilang ban pynbeit ia u pud u sam uba dang sahteng lyngba ka jingiakren, ha kaba ki nongialam na kine ki 2 tylli ki Jylla kila banjur ia ka jingkongsan ban pynneh ia ka jingiadei kaba iajan hapdeng ka jongki.
