Shillong LS Byelection | Ka HSPDP kan long neutral ha ka elekshon | Kan ym kyrshan ia u kyrtong UDP

Shillong, Naitung 09 : Ka Hill State People’s Democratic Party (HSPDP) ha ka sngi Palei kala pynbna ba kan ym iashah iano iano ruh (neutral) ha ka elekshon shiteng samoi ban wan ka Shillong Lok Sabha bad kan ym kyrshan satia ia u kyrtong ba pynieng da ka United Democratic Party (UDP)-kaba iatreilang ha ka Regional Democratic Alliance (RDA).

U President ka HSPDP Bah KP Pangniang ula ong ba ia kane ka rai la shim hadien ka jingiakren hapoh Iing, haba kdew ia ka jingduna ka por ban sei iala u jong u kyrtong bad ka jingmih ki jingiapher jingmut ia u kyrtong monlang jong ka RDA.

“Ngin ym iakhun ia kane ka elekshon shiteng samoi na ka bynta ka Shillong MP Parliamentaty seat” ong u Bah Pangniang.

Ula pynkynmaw ba ka HSPDP kala kyrshan ia u kyrtong ka UDP bala sei hapoh ka lama jong ka Regional Democratic Alliance (RDA) ha ki artylli ki elekshon bala dep.

“Hooid, ngi dei shibynta jong ka RDA. Ngi la kyrshan iaki kyrtong ka UDP hapoh ka kyrteng jong ka RDA ha ki artylli ki elekshon bala dep. Hynrei ha kane ka kynti, na ka liang jong ngi, ngi la kren shai ba ngin ym kyrshan satia ia u kyrtong ka UDP” ula ong.

U Bah Pangniang ula pynpaw ba ka HSPDP ka kwah ban sei iala u jong u kyrtong hynrei kam shym la poi sah ka jingiasngew thuh jingmut hapoh ka RDA.

“Ka daw ka long ba na ka liang ka party jong ngi, hadien ka jingiakren kaba sani bha, ngi kwah ban pynieng iala u jong u kyrtong ryngkat ka shap jong ka party. Hynrei ngim shym la poi sha ka jingiasngewthuh jingmut hapoh ka RDA” ula ong.

“Ngi la pyrshang ruh ba lada ki ar party ha ka RDA ki lah ban iawanlang, ngi lah ban pynieng ia u kyrtong da u shap ba iamon lang. Ngi la iakren ia kane ruh” ula ong haba pynshai bad kane ka sienjam kam dei satia kaba la iamynjur nab aka UDP kala pyrshah.

Namar ka jingbym sei kyrtong, ka HSPDP kala pynpaw ba kan ieh ha ka rai jong ki nongkyrshan iano ba kin leit ban kyrshan ha kane ka elekshon shiteng samoi.