Shillong, Naitung 09 : U Myntri Rangbah ka Assam Himanta Biswa Sarma ha ka sngi Palei ula ong ba ki jingiakren bad ka Meghalaya halor ka kam iakajia pud ka dei kaba dang bteng bad kam shym don satia kano kano ka jingbym sngewhun kaba mih hapdeng ki artylli ki Jylla.
Haba kren bad ki nongthoh khubor, u Himanta ula ong ba ki ar Sorkar ki ju iakren man ka por ban pynbeit ia kino kino ki jingeh kiba mih ha ki jaka khappud.
“Nga ju iakynduh man ka por ia u CM bad DyCM. Kumta, ka lad jingiakren ka long kaba plie beit. Ngi ju iakynduh man ka por bad kam don satia kano kano ka jingbym sngewhun. Haba jia kano kano ka jingjia, ngi ju pynbeit ia ki mardor da ka mynsiem jong ka jinglong paralok” ong u Himanta.
Haba kylli halor ki khubor iakynad kiba mih man ka por ha ki jaka khappud, u Mytri Rangbah ka Assam ula ong “Ngam tharai..baroh kiei kiei ki iaid beit iaid ryntih”.
Kane ka jingkynthoh kala mih tang da ki sngi hadien ba ka Sorkar Meghalaya kala thaw thymmai ia ki Regonal Committee ban pyntyllun shakhmat ia ka wat ba-ar jong ka jingiakren pynbeit pud.
Ia ki Committee la bynshet ba ki pynbeit ia ki jingiakynad ba dang sahteng ha ki 6 tylli ki jaka hapdeng ka Meghalaya bad Assam.
Ha ka wat ba nyngkong, ki artylli ki Jylla kila iasoi ia ka soskular ha u bnai Lber 2022 ban pynbeit noh ia ki jingiakynad ha ki hynriew napdeng ki 12 tylli ki jaka.
Ka wat kaba ar ka thmu ban pynbeit ia ki hynriew tylli ki jaka ba dang sah-Langpih, Borduar, Nongwah-Mawtamur, Deshdemoreah, Block I bad Block II, lem bad ka Psiar-Khanduli.
Baroh arngut ki Myntri Rangbah kila pynpaw man ka por ia ka jingkut jingmut ban pynbeit noh ia ka jingiakajia pud kaba la neh da ki phew snem lyngba ka jigiakren bad ka jingiasngewthuh jingmut lang.
