Shillong, Naitung 08 : U Symbud Myntri Rangbah Bah Sniawbhalang Dhar ha ka sngi Balang, ula pynpaw ba ka Sorkar ba ialam da u Conrad K Sangma kan ieng skhem ban iada ia ki paid Khristan bad kan iai bteng ban sngap ia ki jingsngewkhia bala pynsngew da ki paidbah.
Haba iakren bad ki nongthoh khubor, u Bah Sniawbha ula ong ba u Myntri Rangbah dang shen ula ialam ia ka kynhun ki Nongialam Balang ban iakynduh ia u Myntri Kam Pohiing ka Ri Amit Shah ha New Delhi, ban iakren ia ki kam ba iadei bad ka Foreign Contribution (Regulation) Act (FCRA) kaba ktah ia ki niam hapoh ka Jylla.
“Hapoh ka jingialam u Conrad K Sangma, ngi don beit hangne ban iada iala ki jong ki briew, khamtam haba ki mad ia ki jingeh kiba iadei bad ki Balang bad ki paid Khristan jong ka Jylla. Ngi don hangne ban iada bad ban sngap ia ka sur jong ka jingkyrpad na ki briew jong ngi, bad ngi la leh ia kata” ong u Bah Sniawbha.
Ula ong ba u Myntri Rangbah ula pynioh ia ka por ban iakynduh ia u Myntri kam Pohiing ka Ri bad da lade hi ula synran ia ka kynhun ban pynthikna ba ia ki jingsngewkhia jong ki, la ioh sngew beit beit da ka Sorkar Pdeng.
“U Myntri kam Pohiing ula ai ka por ia u Myntri Rangbah jong ngi. Hapoh ka jingialam jong u, ula ialam ia ki Nongialam Balang ban buh ia ki jingkyrpad ba iadei bad ka FCRA hakhmat u Amit Shah” ula bynrap.
U Bah Sniawbha ula pynpaw ruh ba ka Sorkar hi kan ieng skhem ban iada ia ka bha ka miat jong ki paid Khristan ym tang ha Jylla hynrei ha kylleng ka Ri.
U Symbud Myntri Rangbah ula pynpaw ia ka jingsngewnguh ia ka Myntri kam Pohiing ba u kloi ban iakynduh ia ka kynhun.
