Guwahati, Naitung 7: Ka tnad ka koit ka khiah ka Assam, ka la sdang ïa ka jingtohkit, halor ka jingiap ki 49 ngut ki khunlung ba dang kha, ha ka district Sribhumi, ha kine ki lai bnai ba ladep, hapdeng ka jingkiew ka jingsngewkhia, halor ka jingsumar ïa ki khyllung ba dang kha bad ki longkmie ha Barak Valley.
Ki jingkheiñ ba thikna ki la pyni ba ki don 49 ngut ki khyllung ba dang kha ha Sribhumi hapdeng ka 1 tarik Iaiong haduh ka 3 tarik Naitung. Ha kajuh ka por, ka Cachar ka la don ka jingïap jong ki khyllung ba dang kha haduh 74 ngut bad ha Hailakandi 25 ngut, kaba pynlong ïa ka jingïap jong ki khyllung ba dang kha ha kylleng ki lai tylli ki District jong ka Barak Valley sha ka 148 ngut.
Ki jingiap ki la pynlong ia ka jingbishar bniah ia ka jingsumar ia ki khyllung ba dang kha, ki jingsumar ia ki khunlung bad ki rukom phah sumar kyrkieh ha ka thain.Ka jingtohkit ka long ruh hadien ka jingiap jong ki arngut ki longkmie ha Sribhumi ha u bnai Jymmang.
Ka Joint Director jong ka Health Services ka Dr Matindra Sutradhar ka la ong ba man la kawei pa kawei ka jingiap jong ki longkmie bad ki khunlung ba dang kha ha ka distrik la ju eksamin lyngba ki case study kiba bniah ban tip ia ki daw ba thikna bad ban lap ia ki jingduna ha ka jingai jingsumar.
Katkum ka tnad ka Koit ka Khiah, ki daw kiba kongsan eh jong ka jingiap jong ki khyllung ba dang kha ki long ka birth asphyxia, low birth weight bad ka neonatal sepsis.Ki heh sorkar ki la ong ba ka jingpang birth asphyxia, kaba mih na ka jingduna lyer oxygen ha ka por ba kha ne marsien kha khun, bad ki jingpang ba jur bha na ki khniang jingpang ki dang long napdeng ki jingma kiba khraw tam ïa ka jingim jong ki khunlung ba dang kha.
Ia ki arngut ki kmie kiba iap la pynshong nongrim ha ka jingmih snam palat hadien ba la kha khun.Kawei ka kynthei ka la dep ban ithuh kum ka jingkha khun kaba don jingma bha (high-risk pregnancy), katba kawei pat ka la ioh ia ki jingeh hadien ba ka plasenta kam shym la lah ban iakhlad noh hadien ba la kha khun.Wat hapdeng ka jingïarap jong ki doktor, baroh arngut ki kynthei kim shym la lah ban iarap pynim ia ki.
Ki heh ophisar jong ka koit ka khiah bad ki riew shemphang ki la ong ba ki jingkheiñ ki pynpaw ruh ïa ki jingeh kiba la slem bha ha ka liang ka jingtei ha Barak Valley. Katto katne tylli ki jaka ba kyndong ki dang ïai bteng ban ïakynduh ïa ka jingbym biang ki surok, kaba pynslem ban pynkynriah ïa ki khyllung ba dang kha bad ki longkmie ba armet kiba pang jur sha ki hospital jong ki district lane sha ka Silchar Medical College and Hospital.
Ki heh ophisar sorkar ki la ong ba ka jingbym don ki kali kit nongpang, ka leit wan kaba jngai bad ka jingpynslem ban phah sumar bunsien ka pynduna ïa ka lad ban im ha ki jingjia ba kyrkieh ha ka liang ka koit ka khiah.
Ka tnat ka Koit ka Khiah ka la sdang ban bishar ïa ka jingtreikam jong ki Special Newborn Care Units (SNCUs), ki maternity wards, emergency referral systems bad ha kylleng ki jaka sumar sorkar. Ki bor pyniaid ki la ong ba man la ka jingiap la ju bishar bniah ban lap ia ki jingduna ha ka system bad ban ai jingmut ia ki lad ki lynti ban pynbeit.
Ki riew shemphang ha ka liang ka koit ka khiah ki la ban jur ba ban pynduna ïa ka (maternal and neonatal mortality) ne ka jingïap jong ki longkmie bad ki khyllung ba dang kha ka donkam ïa ka jingsumar ba kham bha, ka jingpeit bniah man ka por shwa ban kha, ka jingpynbha ïa ka jingbam jong ki longkmie, ki nongtrei ka koit ka khiah kiba tbit, ki jaka sumar ïa ki khyllung ba kham biang, ki jingshakri ambulance kiba lah ban shaniah bad ka jingpynïasoh ïa ki surok.
Ka tnad ka koit ka khiah ka la ong ba kan pynbeit ia kino kino ki jingduna bad shim ia ki lad ki lynti ban pynbeit ban pynkhlain ia ki jingshakri ha ka koit ka khiah ha ka thain.
