Shillong, Naitung 06 : Palat kawei na ki lai bynta jong ka jingdon ki nongthep vote ha Meghalaya kila ioh pdiang ia ki enumeration form ha ka Special Intensive Revision-2026 ba dang iaid mynta, pyntip u Chief Electoral Officer ka Jylla.
Kat kum ka kaiphod ba khatduh bala pynlait da u CEO ha ka sngi Nyngkong, haduh 8,62,594 ki enumeration form la dep bam sam napdeng ki 23,49,645 ki nongthep vote, kaba kot ia ka 36.71%.
Ia kane ka jinglum jingkhein ia ki nongthep vote la leh da ki 3,551 ngut ki Block Level Officer bala buh ha kylleng ka Jylla, ha kaba man ki BLO kila dep ban sam ia kumba 243 tylli ki form kat haduh hynne ka sngi.
Ka kaiphod ka pyni ba ka South West Garo Hills kala jam shakhmat napdeng kiwei pat ki district, da ka jinglah ban sam ia ki form haduh 86,615 (79.55%) na ki 1,08,883 ki nongthep vote.
Ka North Garo Hills ka wan ba-ar da 55.98% da ka jinglah sam haduh 80,468 tylli ki form, ka East Garo Hills da 42.34% da ka jinglah sam 48,593 tylli ki form.
Ka East Khasi Hills, kaba don bun eh ki nongthep vote ba kot 6,32,146 ngut, kala pyndep ia ka jingsam sha ki 2,07,420 ngut ki nongthep vote lane 32.81%.
Ha kawei ka liang, ka East Jaintia Hills ka dei kaba duna eh ha ka jingsam ia ki form kaba dang kot tang 18.69% lane dep sam 19,517 tylli ki form. Ka South West Khasi ka kot 20.75% da 16722 tylli ki form, katba ka West Jaintia Hills kala kot 23.94% da 52,787 tylli ki form.
Namar ka jingsah sa 63.29% na ki nongthep vote ban ioh ia ki form, ka Ophis u CEO ka pyntip ba ka jingleit pynshisha na kawei pa kawei ka thliew iing kan dang iai bteng ha ki taiew ban wan.
Ki nongthep vote ki lah ban pan ia ki jingiarap lyngba ka toll-free helpline 1950 lane da kaba download ia ka ECINET bad Voter Helpline App.
Ia ka SIR-2026 la pynlong hapoh ka jingbthah ka Election Commission ka ri India ban ioh ia ka “Electoral Roll kaba beit thik pa thik, bad ka synshar paidbah kaba khlain”.
