Dawa ka HBDRF ia ka Sorkar ban nym klet ia ka kaiphod 1958 | Ka Block-I ka dei jong ka Meghalaya

Shillong, Naitung 3: Ka Hynniewtrep Border Dispute Redressal Forum (HBDRF) ha ka sngi Thohdieng, kala kyntu ia ka Sorkar Meghalaya ba kam dei ban kyntait sharud ia ka kaiphod jong ka jingphiah ia u pud kaba ha u snem 1958 halor ka Block I, ha ka jingiakren pynbeit ia u pud u sam ha ki 6 tylli ki jaka kiba dang sahteng bad ka Assam.

“Ngi kwah ba ki Regional Committee ka Meghalaya kam dei ban leh matlah ia katei ka jingpynbna ne Notification 1958 namar ba ha u snem 1957 la pynlong ia ka jingiajurip lang da ka Assam bad Meghalaya ha kaba iadei bad ka Block I bad hadien ba lah dep ka jingphiah ia u pud ia baroh arliang, la pynmih ia ka Kaiphod ha u 1958,” la ong u Nongaiktien ka HBDRF bad u Working President ka KHNAM u Bah Thomas Passah haba iakren bad ki nongthoh khubor hadien ka jingwan aiti ia ka shithi sha u Myntri Rangbah ka Jylla u Conrad K Sangma.

“Kane ka kaiphod 1958 kala kdew shai ba kaba bun hi ka jaka kadei kaba la longtrai da ki Pnar bad kumta, dei ban pynphai biang sha ka jylla Meghalaya” ula ong.

“Ngi dap da ka jingsngewsih lada ka sorkar Meghalaya ne ka Regional Committee kan kyntait noh sharud ia ka kaiphod jong u snem 1958”.

Ka sorkar jylla ha ka 30 tarik u Jylliew kala pynmih ia ka jingpynbna ia ki jingthaw Regional Committee ban pynshisha ia ki 6 tylli ki jaka kiba dang sahteng ha ka wat ka baar jong ka jingiakren pynbeit pud.

U Bah Passah ula pdiang ia ka Terms of Reference (ToR) ne ki kyndon jong ka Notification, kaba donkam ia ka kynhun ba kan khmih bniah ia ka jinglong jingman jong ki nongshong shnong ha ki shnong katkum ka khanasamari ne Census kaban kynthup ia ka jingpynshisha, ban leit jngoh ia man la ki shnong bad ban iakren bad ki jaidbynriew kiba shong basah ha ki shnong kynthup ia ki nongmihkhmat jong ki Autonomous District Council bad kiwei kiwei kiba donbynta lang ban sngewthuh ia ka jingsngew jong ki paitbah kiba sah ha kitei ki thaiñ”.

Ka ToR ka khot ruh ia ka jingbuh rekod ia ki kot ki sla jong ki jingtip kiba shisha ha kaba iadei bad jinglong bad ka por jong ka jingjngai jong ki shnong sha ka jaka kaba jan tam jong ka jaka thep vote ne Polling Service Delivery Point ne na ka ophis jong ki tnad sorkar”

“Ngi lah iohi ia ka ToR ba ka Sorkar Meghalaya kala buh ha ka jingthoh ka long kaei kaei kaba sngewhun” ong u Bah Passah.

Ka Forum kala aiti ia ka dorkhas ha u Myntri Rangbah bad pynbor ba baroh kitei ki kyndon kiba la dep ban pynmih ha ka jingpynbna da ka Sorkar Meghalaya dei ban bud ryntih da ka jingthoh bad da ka kam.

“Ngi kwah ba ki committee kiba iadei bad ka Block I bad II ban leit sha ki shnong ki thaw, leit iakren ha man la ki shnong, dei da kane kaba ngin lah ban ioh ia ka kaiphod kaba shisha” ong u Bah Passah.

Ula pynpaw ia ka jingsngewkhia ha kaba iadei bad ka wat kaba nyngkong, da kaba ong, “Katkum ka MDA-I committee, ngi lah iohi ia ki dkhot jong ki Regional Committee kim shim la leit jngoh ia ki shnong, ki shu shong tang ha kawei ka kamra bad leh ia ka jingpynbiang ia ki kot ki sla kaba lah ban lam sha ka jingbakla ha ka jingpynmih ia ka kaiphod”.

“Ban pynthikna ba kan ym don kano kano ka jingbakla ha ka kaiphod bad ba ka kaiphod kan long kaba sngewhun da ki paitbah kiba sah ha ka thain khappud bad ia ki paitbah ka Meghalaya, ngi kwah ba ki Regional Committee kin bud ia baroh ki kyndon jingbthah kiba la kdew ha ka ToR kumba la pynmih ha ka 30 tarik u Jylliew 2026” ula bynrap.

U Bah Passah ula ong, ba ka Forum kala dep ban aiti shi bnai mynshwa, sha u Myntri Rangbah ia ka kopi jong ka Notification ha u snem 1958, kaba la pynmih ha ka por bym pat phiah ia ka Assam.

Ha ka shithi sha u Conrad Sangma, ka HBDRF kala ong, “Nyngkong nyngshap, ngi kwah ban pynpaw ia ka jingsngewnguh ia ka Sorkar Meghalaya kaba la thaw ia ka Regional Committee ban pynbeit ia u pud u sam uba lah sahteng hapdeng ka jylla Meghalaya bad Assam.”

Kala kyrpad ia ka Sorkar bad ia ki dkhot jong ka Committee ban leit jurip ia ki shnong jong ki Khasi Pnar ha Block 1 bad 2 bad ban iakren bad ki nongshong shnong ban sngap ia ka jingsngewkhia ka jongki.

Ka Forum kala ong, ba ka long kaba kongsan ia ki dkhot jong ka Regional Committee ban iatreilang bad baroh kiba donbynta kum ki Dolloi, nongialam sengbhalang, Waheh Shnong bad kiwei kiwei kumba la kdew ha ka kyndon treikam jong ka jingpynbna ka Sorkar.

“Ngi kloi ban ai ka jingtreilang bad ngeit skhem ba kane ka jingpynbeit ia u pud u sam kaba la sahteng yn lah ban pynbeit noh, ban ailad ba ki jaka naduh ki longshwa manshwa kin long kaba iasoh biang bad ki jaka kiba kongsan kumba la long naduh ki por hyndai hynthai” la ong ha ka dorkhas.