Plie u CM ia ka Academy ban ai jinghikai pyntbit ia ki Nonghikai ka Jylla

Shillong, Naitung 02 : U Myntri Rangbah Conrad K Sangma ha ka sngi Palei, ula plie paidbah ia ka Meghalaya Teachers Training Academy (MTTA) ha ka jingdonlang u Myntri ka tnad Pule Puthi Bah Lahkmen Rymbui, ki Heh Ophisar bad ki kynhun ba don bynta na ka kam pule dangle.

Haba ai jingkren ha ka jingialang, ula ong ba katba ka jingtei dalade ka dei kaba la dep ban plie kham hashuwa, ‘mynta ka sngi ka pyni ia ka jingsdang jong ka academy, ka thong jong ka, ka jingthmu jong ka bad ka jingtreikam jong ka”.

Haba ai khublei ia ka Tnad Pule Puthi, ula ong “Kane kam dei satia tang halor ka jingtei, ka dei halor ka jingwanrah ia ka rukom treikam ka ban pynkhlain ia ka nongrim jong ka pule dangle ha Meghalaya. Kane ka academy kan shim ia ka bynta kaba donkam bha ha kaban weng ia ki jingduna kiba la slem bha, khamtam ha ka jingai jinghikai pyntbit ia ki nonghikai”.

Ka jingthaw ia ka MTTA kala wan kum ka jubab ia ki jingeh ba hakhmat eh kiba la pynpaw ha ka National Assessment kum ka PGI 2.0 bad PARAKH Rashtriya Sarvekshan 2024, kaba la buh ia ka Meghalaya ha ka kyrdan ba shatrai duh (Akanshi-3) ha ka Students Learning Outcomes ne jingmih ba ki khynnah skul ki ioh na ki jingpule.

Ki jingkhein ki batai ruh ba tang 17% na ki nonghikai hapoh ka Jylla kila iashimbynta ha ki jingpyntbit ia ka kam ba ki trei ha ki snem bala leit noh.

Haba shimkhia ia kane, ka Sorkar kala kynriah noh na ki jingpynlong ia ki jingai jinghikai ne workshop ba shisien lano sha ka rukom treikam kaba la pynbeit ryntih, ka jingai jinghikai pyntbit kaba iai bteng khlem sangeh. Ia ka MTTA la seng kum ka shnat treikam ba laitluid hapoh ka Meghalaya Societies Registration Act, 1983, kaba don ia ka jingkyrshan kaba khlain ha ka jingpyniaid kam bad ka jingkhmih beit beit da ki briew kiba don ha ka kyrdan ba halor tam.

Ula kubur ia ki jingkyllain ki kam ha kaban pynkylla ia ka kam pule dangle bad ong “Ka pule dangle ka long kum u ksai ba sohkyrdot, lada phi tan eh palat ia uwei u ksai ba sohkyrdot, uwei pat u nang skhem. Ngi dei ban law suki suki ia u ksai ba sohkyrdot” ula ong haba ban jur ba ki jingkylli kiba don jingmut ki donkam ia ki jingpyrshang ba iai bteng ban ia ka jingpynbeit ba hakdak.

Ula kren halor ki rai ba kongsan bala shim da ka Sorkar, kynthup ka jingpynbeit ryntih ia ka jingsiew jong palat 23,000 ngut ki nonghikai SSA, ka sienjam kaba hap ban pynlut pisa jan kumba T.800 klur ha ka shisnem. “Kine ki dei ki rai kiba eh hynrei kiba donkam” ula ong.

Ka MTTA ka wanrah ïa ka rukom treikam “Hub-and-Spoke” model, ha kaba ka academy kan long kum ka Apex body kaba iasoh bad ki DIET bad ki CTE ha baroh ki district. Kane ka pynthikna ba ka training kaba bha bad kaba janai kan poi sha ki nonghikai kaba long markam ki jaka trei jong ki, bad ban pynduna ïa ka jingshim ia ka por jong ki ban don ha ki skul.