Shillong, Naitung 01 : Ka Sorkar Jylla kala pynlait ia ka instalment ba khatduh jong ka song kyrpang ban khangdam ia ka karkhana sha ki nongtrei ka Mawmluh Cherra Cement Limited (MCCL), kaba pyndep ia ka jingsiew ba T.90 klur hashuwa ka por bala buh, ong u MLA ka Sohra Gavin M Mylliem ha ka sngi Balang.
“Hooid, ka Sorkar kala pynlait ia ka instalment ba khatduh jong ka pisa ba dei ban siew ia ki nongtrei ha ka taiew ba lah, bad ka MCCL ruh kala ioh pdiang ia kane ka pisa. Ia mynta, kila sdang ban pynlait ia ka pisa sha ki nongtrei ka MCCL” ula ong.
Ka Sorkar Jylla kala pynba ia ka skhim khangdam ia ka MCCL sha ki nongtrei ha u bnai Kyllalyngkot 2025, da ka jingkular ban siew T.90 klur ha ki lai instalment ha kine ki lai snem mang tyngka.
“Ia ka instalment ba nyngkong la pynlait ha u Lber 2025 –kumba T.36 klur, kaba long 40% jong ka T.90 klur. Ka instalment ba-ar la siew ha u Naitung 2025, kumba T.27 klur kaba long 30% jong ka T.90 klur. Khatduh, mynta u bnai ka Sorkar kala pynlait ia ka instalment ba khatduh kaba long T.27 klur, kaba kot 30% jong ka T.90 klur” ula ong.
U Bah Gavin u pyntip ba ia ka jingsiew ba pura la pynkhuid tang hapoh ki ar snem mang tyngka ha ka jaka lai snem kumba la kular.
U MLA ula ai khublei ia ka Sorkar MDA namar ka jingpynkloi ban pynlait ia ka pisa.
“Namar kata, ngi da sngewnguh eh ia ka Sorkar MDA hapoh ka jingialam u Myntri Rangbah namara jingsngap ia ka jingkyrpad ki nongtrei ban pynlait noh kham kloi ia baroh ka pisa. Kane ka pyni shai ba ka Sorkar MDA ka dei ka Sorkar kaba bat ia ki jingkular” ong u Bah Gavin haba pyntip ba ia ki jingsiew sha ki supplier ka MCCL ruh lah dep ban siew khuid lut.
, kaba pyndep ia ka jingsiew ba T.90 klur hashuwa ka por bala buh, ong u MLA ka Sohra Gavin M Mylliem ha ka sngi Balang.){kind=link}