Iakynduh ka KSU ia u CM halor ki 20 tylli ki mat jingdawa | Dawa leh eiei kyrkieh halor ka ILP bad MRSSA

Shillong, Naitung 01: Namar ka jingpynslem ban pyntreikam ia ki ain kiba thmu ban pyrrkhing ia ka jingrung kyrthep ki briew ba nabar Jylla, ka Khasi Students’ Union (KSU) ha ka sngi Balang kala pynpaw hakhmat u Myntri Rangbah Conrad K Sangma ba kan “pyndonkam iala ka jingstad” ban pyntreikam hi ia ki ain lad aka Sorkar kam leh eiei noh, ong u President ka KSU samla Raymond Kharjana hadien ka jingiakynduh ka Central Executive Committee (CEC) ia u Myntri Rangbah.

Ka jingialang kala pynleit jingmut halor ki 20 tylli ki mat jingdawa jong ka Seng, kaba kala dep ban aiti kham hashuwa ba kynthup ia kaba phah online.

“Ka jingiakren ka long kaba jrong bha” ong u samla Raymond haba pyntip ba ka CEC kala rah nyngkong eh ia ka mat ba iadei bad ka jingdawa pyntreikam ia ka Inner Line Permit.

“Ngi la kren shai ia ka nongrim jong ngi haba iadei bad ka jingpyntreikam ia ka Inner Line Permit” ong u samla Raymond bad bynrap ba u Myntri Rangbah ula pyntip ia ka kynhun ba ka jingtyrwa kala don bad ka Sorkar Pdeng.

Une u Nongialam ka KSU ula ong “U Myntri Rangbah ula iathuh ba kane ka kam kala sahteng bad ka Sorkar Pdeng bad kular ia ngi ba ka Sorkar Jylla kan iai bteng ban kyntur ia ka Sorkar Pdeng ba kan pyntreikam noh mardor ha Meghalaya”.

Halor ka Meghalaya Residents Safety and Security Act (MRSSA), 2016, u samla Raymong ula ong ba ka Seng kala pyrshah ia ka jingthmu ban pyntlot ia ki kyndon jong kane ka ain.

“Ngi la iakren ia ka kam ba iadei bad ka MRSSA. Ha ki khyndiat sngi bala leit, kala don ka jingpyr shang ban pynkylla ia ki Facilitation Centre, lane Entry-Exit Point, sha ki Food Court. Ngi la kren shai ia ka nongrim jong ngi halor kane ka kam – ngin ym ailad ia kino kino ki seng lane ka Sorkar ban pynkylla ia ki facilitation centre sha ki food court” ula ong.

U ong ba ia kane ka ain ym pat pyntreikam satia wat hadien phra snem bala mynjur ia ka.

“Kala don ka jingpynslem shaba palat ha kaban pyntreikamia ka. U Myntri Rangbah ula pynpaw ia katto katne ki jingeh, bad ong ba kane ka kam ka iatakhuh bad ki ain ka Sorkar Pdeng bad kala sah teng ban ioh jingmyntoi na u Lat” ong u samla Raymong.

Ka Seng, kala ban jur halor ka jingpyntreikam. “Ngi la krenn shai ba ngi kwah ia ka Sorkar ban pyntrei kam pura ia ki entry-exit point kumba la pynkupbor da ka MRSSA” ula ong.

Ia ka Meghalaya Identification, Registration (Safety & Security) of Migrant Workers Act, 2020 ruh lah iakren ha kane ka jingialang. “Ha kine ki khyndiat snem bala leit, ka seng kala aiti ia ki jingai jingmut ban pynrung ia ki katto katne ki kyndon kiba donkam ban pynkhlain ia ka Act. Hynrei sngewsih, ngin dang ban iohi ia ka jingpyntreikam ba pura ia ka” ong une u nongialam ka KSU.

U iathuh ba u Myntri Rangbah ula ai ia ka jubab kaba sngewtynnad halor ki jingai jingmut ba kongsan jong ka Seng.

“U Myntri Rangbah ula kular ba ka Sorkar kan sa shim ia ka sienjam ban pyntreikam ia ka Act. Ka jing ai jingmut jong ngi ka long kaba suk – pynthikna ia ka jingpynshisha ki Pulit ia ki nongbylla ba wan nabar Jylla sha ka Jylla jong ngi. Ka Sorkar kala pdiang ia kane bad nga kyrmen ba ngin iohi noh ia ka jingpyntreikam bha ia ka” ula ong.
U samla Raymond ula pynpaw ba ka KSU ka iohi ia ka jingbym leh eiei haba iadei bad kine ki lai tylli ki ain.

“Haduh mynta, ngim pat iohi ia kano kano ka ain ka ban khang ia ka jingwan rung kyrthep ki briew ba nabar sha Jylla. Lada ngi iakren halor ka ILP, ka jubab ka long ba kane ka kam ka sahkut bad ka Sorkar Pdeng. Lada ngi iakren halor ka MRSSA, ngi ioh ia kajuh ka jubab. Lada ngi iakren halor ka Migrant Workers Act, ka long hi kumjuh” ula ong.

Haba ai jingmaham, ula ong “Ngi kwah ban phah ia ka khubor kaba shai : lada ka Sorkar kam lah ban pyntreikam ia kine ki ain ban iada ia ka hok bad ka jingithuh kyrpang ia ki jaidbynriew trai muluk, ka seng kam banse ban pyntreikam hi ia kine ki ain dala de ban iada ia ka jingmyntoi jong ka jaidbynriew trai muluk”.

Watla u Myntri Rangbah ula ai ia katto katne ki jingkular, hynrei ym ia baroh ki mat la lah ban pynbeit.

“Ki don ki mat kiba u Myntri Rangbah ula kular ban pynbeit ha ki sngi ban wan bad taiew, bad ki don ruh ki mat kiba dang donkam shuh shuh ban iakren” ula ong.

Halor ka jingkylli la ka KSU ka buh ia kano kano ka por, ula ong ba ka por ban ia buh por kala kut.

“Kine ki dei ki jingdawa kiba la sahteng la slem bha. Kam dei shuh ka jingkylli ban ia aipor. Kaba suk eh – lada phim lah pyntreikam ia kine ki ain, ka seng kam don lad pat da kumwei hynrei ban pyndonkam iala ka jong ka jingstad ba kumno kan pyntreikam ia ki. Ha kano kano ka por, phim lah ban ong ba ka seng ka leh ia ki kam beain” ula ong.