Shillong, Naitung 01: Ki nongshong iew ha Khasi Market ha Motphran ki la ai dorkhas sha u Myntri Rangbah ka Jylla Conrad K Sangma ba dawa pynbha mardor ia ka Iew daka ba pynthikna iaka jingshngain, kaba koit ba khiah bad kaba long katkum ka juk mynta ha ryngkat ki jaka rung jaka mih bad ki kor Ventilation hapoh ka iew.
Ïa ka dorkhas la aiti da ka Synjuk ki Nongdie Jain Khasi Market, ka Synjuk ba mihkhmat da 90 ngut ki longkmie Khasi na ki jaka, ki shnong bad ki Constituency bapher bapher jong ka jylla bad ia kane ka dorkhas la soi da ka President Kong Shebarnarlene Nongbet bad ka Secretary Kong Larisuk Ranee.
“Da ka burom bad ka jingsngewrit ngi aiti ïa kane ka dorkhas ba phin pyrkhat lem ha kaba ïadei bad ki katto katne ki jingduna ki jingtei ha Khasi Market kiba donkam ban shimkhia kyrkieh na ka bynta ka jingmyntoi bad ka jingshngaiñ jong ki paidbah, ka koit ka khiah ki paidbah, ka bha ka miat jong ki nongdie jingdie bad ki nongthied nongpet” ong ka dorkhas.
Haba batai ba ka Khasi Market kam dei tang ka iew hynrei ka jaka khaii pateng, ka Synjuk kala ong “Ka Khasi Market kam dei tang ka jaka khaii pateng, ka dei ruh ka dak jong ka jinglong kyrpang ha ka imlang sahlang, ka kolshor, bad ka jingim tynrai jong ka jaitbynriew Khasi ha kaba kham bun ki longkmie kiba kham noh ka rta ki trei shitom bad kamai jakpoh na kane ka Iew”.
Katkum ka Dorkhas, ki nongdie jingdie ki la shong dukan la slem bha ha jingkieng Motphran hashwa ban pynkynriah shipor sha ka jaka ieng kali jong ka Pahsyntiew Ri-Bhoi, kaba ki dang ïai bteng ban pynïaid ïa ki kam haduh mynta mynne.
Ka Synjuk ka la pynpaw ia ki jingeh kiba jur haba iadei bad ka jingshngain bad ka koit ka khiah ha ka jaka ba ki shong die jain mynta kaba don ha Stand Bhoi. “Ka jinglong mynta jong ka ïew ka pynlong ïa ka jaka ba don jingma lada khie jumai, ka jingeh ha ka jingpynkynriah kyrkieh iaki briew, bad ka jingkhapngiah kaba khanglad ïa ka jingrung ka lyer, bad ka buh jingma iaki nongshong dukan ha ka por ba don ki jingjia ba kyrkieh” ong ka dorkhas.
“Ka jingbym don ki jaka rung jaka mih ba kham heh, ki emergency exit bad ki kor Ventilation ka long ka mat kaba pynsngewkhia jur ïa ki paidbah. Ha ka jingjia kaba sngewsih lada lynshop ka bor mariang ne ka jingpluh ding, ki jingtei kiba la don lypa ki lah ban ym ai ki lad ki lynti kiba biang na ka bynta ban pynkynriah suk ïa ki spah ne hajar ngut ki nongshong dukan bad ki nongthied nongpet,” ka la bynrap.
Ki nongdie jain kila dawa ban buh 2 tylli ki jaka rung jaka mih kiba heh, ki Emergency exit bad ki kor ventilation bad ki dawa ruh ban lehkhuid bad pynitynnad iaka Iew.
“Ka Iew kam dei satia ban long tang ka pdeng jong ka khaii pateng, ka dei ruh ban long ka jaka kaba ïada ïa ka jingim briew, kaba kyntiew ïa ka koit ka khiah jong ki paidbah, kaba pynneh pynsah ïa ka burom briew, bad kaba ai ïa ka jaka kaba shngaiñ bad kaba pdiang sngewbha ïa uwei pa uwei u nongshong shnong,” kala ong.
“Ngi ngeit da ka jingburom ba hapoh ka jingïalam jong phi, ka jingshimkhia ba khlem artatien jong ka Sorkar na ka bynta ka roi ka par kaba kynthup lang, ka jingbha jingmiat jong ki paidbah, bad ka jingkyntiew ïa ki jaitbynriew trai Jylla kan pynmih ïa ka jingpyrkhat ban shimkhia mardor halor kane ka jingkyrpad jong ngi” ong ki nongdie jain.
Ki la bynrap ba da ki spah tylli ki longïing trai ri trai muluk ki shaniah pura ha ka Khasi Market na ka bynta ka kamai kajih jong ki.
