Shillong, Jylliew 30 : U Myntri Rangbah Conrad K Sangma ha ka sngi Ba-ar ula ong ba ka elekshon shiteng samoi ban wan jong ka Shillong Lok Sabha ka dei kaba donkam bha bad kyntu ia ki paidbah ban khmih “shabar jong ki party, haba pynpaw ba u kyrtong ka NPP Dr DRL Nonglait kum u briew uba biang eh ban pynsngew ia ki mat ka Jylla ha Parliament.
U Conrad ula pynpaw ba ka Sorkar kan nym iehnoh eiei ruh em ban ioh ia ka jingjop ha kane ka elekshon shiteng samoi.
“Ha man ki elekshon, Nga ju kren shai sha ki lad pathai khubor bad ki paidbah – ha ngi, man ki elekshon ki long kiba donkam. Ngim ju shim sting ia ki elekshon. Ngi hap ban trei shitom. Man ki elekshon ki dei kiba eh. Ngim don satia ia ka jingsngew ban jop beit, bad ngim don ruh ia ka jingsngew ba ngin ym jop, lane ba ngi khein sting” ula ong haba iakren bad ki nongthoh khubor.
“Ngi la trei shitom bha bad ngi kmen palat ba ngi la lah ban sei ia u kyrtong uba biang bha” ula bynrap.
Haba kren halor ki kyrdan u Dr Nonglait, u Myntri Rangbah ula ong “Ngi la iohi ba u Dr Nonglait, nalor ba u dei uwei na kiba biang bha ka kyrdan napdeng ki Khasi, u dei ruh u briew uba la don bynta bha ha ka imlang sahlang”. Ula don bynta bha ha ki kam pynroi jong ka Jylla bad don bynta ha ki kam jong ka Balang.
“Bad kaba kham kongsan, u dei u trei hok ban pynbha ia kiei kiei na ka bynta ki briew jong ngi bad na ka bynta ka Jylla jong ngi” ong u Conrad.
Ula ong ba ka jingdon u Dr Nonglait ha Lok Sabha kan dei ka jingsngew sarong ia ka Jylla. “Nga lah ban ong tang kawei ba kan dei ka khyllip mat kaba kmen ia ki paidbah ka Jylla jong ngi ban iohi ia u briew kum u Dr Nonglait ba un pynsngew ia ka sur bad rah ia ki jingeh ki paidbah ka Jylla hapoh ka Iingdorbar Parliament” ong u Conrad.
“U dei u briew uba lah ban pynkohnguh ia ka Sorkar India da ki jingshisha, u briew uba lah ban kren da ka jingdon ia ka bor, u briew uba tip bha ia jan baroh ki sobjek, u briew uba lah ban leit da ka jingsngew skhem sha kino kino ki Myntri, wat sha u Myntri Rangbah Duh, ban rah hakhmat jong ki ia ki jingeh bad jingdonkam ka Meghalaya” ula ong.
U Conrad ula ong “Kane ka elekshon ka iaid palat ban ia ka kam sain pyrthei. Ka elekshon ka dei eh shaphang ka Khasi Hills, Jaintia Hills bad ki paidbah jong kane ka thain, bad ban lah ha ka ban phah ia u nongmihkhmat uba lah shisha ban kren ia ki ishu jong ka thain bad ka Jylla baroh kawei, ka dei shisha ka jingsarong ia ka Jylla”.
