Shillong Jylliew 29: Ka jingïakynad hapoh ka Meghalaya Cricket Association kala nang jur, ha kaba ka kynhun ki dkhot jong ka Apex Council ha ka sngi Nyngkong, kala pynmih ïa ka kyrwoh bad kynnoh ba u President ka MCA u James K Sangma, uba dang shu shah jied kum u MP ka Rajya Sabha, ula ïaid lait ïa ka riti treikam bad shim ïa ki rai ba shah liang, kaba kynthup ïa ka jingpynsangeh treikam ne Suspon ïa u Honorary General bad ban pynbna ba ka jingialang jong ka General Meeting ka long ka bym don jingmut khlem ka jingioh ia ka jingmynjur na ka Council.
“Tang hapoh jong ka 48 kynta, u President jong ka Association ula iaid ha la ka jong ka mon bad pyndonkam ia ka bor bad khlem ka jingtip, jingiasyllok ne jingmynjur jong ka Apex Council ula suspon ia u Honorary Secretary, pynkut ia ka jingtreikam jong u Head Coach bad Team Manager, pynbna ba ka jingialang kaba la lum da ka General Meeting ka long ka bym don jingmut bad ula phah hi dalade ia ka jingthoh sha ka BCCI halor ka jingpynmih hukum ba shah liang ka jongu” la ong ha ka kyrwoh khubor.
Ki dkhot kila ong, ba ym shim la don kawei ruh na katei ka sienjam kaba la shim kadei kaba ka iaid katkum ka riti treikam jong ka MCA. “Ym tang kawei ruh ka sienjam kadei kaba la wanrah hakhmat jong ka Apex Council ban iatai sani lang baroh. U President ula leh kumba ka Apex Council kam shim la don satia bad la kumba ka riti treikam ka seng kadei tang ka bynta ka jingbit jingbiang ka jongu” kila ong.
Ki dkhot jong ka Council kila kyntait ia ka jingkam u President ba ka SGM kaba la buh ban long ha ka 3 tarik u Naitung 2026, ka long “ka bym donkam”.
“Ka kyndon 26 jong ka riti treikam ka MCA kam shim la ai ia kano kano ka bor ha u President ban pynduh, pyndam ne pynbna ba ka long ka bym donkam ka jingïalang jongka Special General Meeting,” la ong ha ka kyrwoh.
Kila kynnoh ba ka jingshah suspon u Secretary kam lah satia pat ban pynduh pyndam noh ia ka jingialang.
“Ïa ka jingialang la lum da u Honorary Secretary katkum ka riti treikam jong ka seng hashwa ba un shah sospon. Ka jingsuspon kadei ka bym shim la long katkum ka riti treikam namar ba donkam ban don ia ka jingbun briew ne Quorum, ka Show Cause Notice bad ka jingiaid ha ka lynti kaba dei bad ym lah ban khein duh noh ia kano kano ka jingïalang kaba la dep long ha ka lynti kaba dei” kila ong.
“Ka jingialang kadei na ka bynta ki dkhot, ym ia u President. Dei tang ka General Body kaba lah ban rai la ka jingialang jongka kadei ka bym don jingmut. Ka jingialang jong ka SGM ha ka 3 tarik Jylliew 2026 kadei ban iaid beit shakhmat kumba la buh tarik” kila bynrap.
Kila buh jingkylli ruh ïa ki jingkren jong u President halor u Justice (Retd) BD Agarwal kum u Ombudsman.
“Hapoh jong ka Rule 40(1), ia u Ombudsman dei ban thung da ka General Body ha ka Annual General Meeting. Ka jingiateh kular ka bym pat biang ban thungkam kam dei satia ka jingthung” kila ong.
“Lada ïa u Justice Agarwal la mynjur khlem da pynbeit, hynrei ym shym la thung pat lyngba ka AGM, um dei u Ombudsman uba la thung hok da ka MCA. Kino kino ki jingshim kam kiba la leh hapoh ka bor jongu ki long ki bym shim la iaid katkum ka riti treikam” kila bynrap. Kila ong, ba u President “um lah ban pyndonkam ia ka jingbym don jong u Ombudsman ban pynshisha ia ka jingshim ia ki sienjam ba kyrkieh” haba u don ia ka bor ban pynlong ia ka jingialang jong ka AGM/SGM ban don ia ka jingthungkam ha ka rukom kaba biang.
Ki dkhot kila ong, ba ka jingpyntip beit jong u President sha u President ka BCCI kadei ka jingpynkheiñ ïa ki kyndon jong ka riti synshar ka ri. “Hapoh ka kyndon 17(k), dei ka Apex Council, ym u President uba bat ïa ka bor ban ïakren bad ban ai jingmut sha ka BCCI na ka bynta ka seng,” ong ka kyrwoh.
“Ka shithi kaba long tang shiliang sha ka BCCI, kaba pyni ia ki kam ba la leh khlem ka jingbun paid bad khlem ka jingmynjur lang jong ka Apex Council kum ka kynhun kaba la mynjur da ka MCA, ka ialam bakla ia ka nongrim jong ka riti treikam jong ka Association” kila ong.
Kila ai ka jingkyrshan ban shim ia ki sienjam pyrshah ia ka jingleh ia ki kam khlem akor, hynrei kila banjur ba dei pat ban bud ia ki rukom treikam. “Ym don uwei ruh u briew uba don ia ka jingmut jingpyrkhat kaba bha kiban ia shah ia ka jingleh ia ki kam khlem akor. Ki dkhot kiba sngewkhia jong ka Apex Council ki long kumjuh lang ha kaban iada ia ki nongialehkai kynthei” kila ong.
“Hynrei yn ym lah pat ban iashah ia jingleh bakla ne ka jingbynm khein snep ia ka riti treikam wat lada kano kano ka jingkynnoh ka long kaba sngewkhia bha bad dei ban leh ha ka lynti kaba shonghok, da ka jingiatreilang bad katkum ka aiñ lyngba ka Show Cause Notices, ki Disciplinary Sub-Committee bad u Ombudsman” kila bynrap.
“U President uba iaid lait ia ka riti treikam ha ka kyrteng jong ka jingai ia ka hok, ka mut ym shim la ai satia ia ka hok, ula aiti ia la ka jong ka jingbishar shimet” la ong ha ka kyrwoh.
“Hapoh jongka Rule 16, baroh ki bor synshar, bor pyniaid bad jingshim ia ka rai ka shong ha ka General Body. Ka Apex Council ka pyntreikam ia ka bor kumba la pynkhamti da ka General Body” kila ong.
“Ka Rule 16(b) kala pynpaw shai ba ka ai bor ïa ka General Body ban bishar bad ban pynkylla biang ïa kano kano ka rai jong ka Apex Council. Kane ka mut ba ka General Body, ha ka SGM jong ka 3 tarik u Naitung 2026, ka don ïa ka bor kaba pura katkum ka riti treikam ban bishar bniah bad pynkylla biang ïa kano kano ka jingleh kaba marwei kaba la shim da u President” kila ong.
“Ka jingpynbna jong u President ba ka SGM ka long ka bym don jingmut kadei ka bym don nongrim satia katkum ka riti treikam. Ka SGM katkum ka riti treikam kadei kaba donbor tam ha ka jingialang ia kaba lah ban pynlong ha kane ka por” kila bynrap.
Kila kyntu ia baroh ki District Association ba kidei ban wan iashimbynta ha katei ka jingialang.
“Kano kano ka jingpynbna jong u President, kano kano ka jingpynmih hukum kaba leh marwei bad kano kano ka jingialang bad ki nongpathai khubor kam lah satia ban knieh noh pat na ka General Body ia ka bor ba hakhlieh eh katkum ka riti treikam”, kila ong bad ka pynshai ba kim pyrshah pat ban shim ia kino kino ki sienjam pyrshah ia kiba leh bakla.
“Kane ka kyrwoh kam dei satia kaba thmu pyrshah ïa uno uno u riewshimet ne ban khanglad ïa kano kano ka jingleh kaba dei hok pyrshah ïa kito kiba la lap ba ki donkti ha ka jingleh bakla. Ngi ieng skhem bad ki nongïalehkai kynthei. Hynrei, dei ban ai pat ïa ka hok da kaba iaid katkum ki rukom treikam jong ka riti treikam, ym ban ialeh pyrshah pat ïa ka riti treikam” la pynkut ka kyrwoh.
