Shillong, Jylliew 29 : U Myntri Sorkar bad Chairman ka South Shillong Advisory Committee Bah Sanbor Shullai ula leit buh ia ka mudui ha u Lat ka Jylla CH Vijayashankar ba un sangeh shuwa ka ai jingmynjur ia ka Khasi Hills Autonomous District (Trading by Non-Tribals) (Amendment) Bill, 2026, haba pynpaw ba kane ka Ain ka long pyrshah ia ka Riti Synshar bad shabar u pud treikam ka KHADC.
Ha ka mudui bala aiti sha u Lat ha ka sngi Nyngkong, u Bah Sanbor ula pyrshah ia ka kyndon ba “pynlong kongsan ia man ki nongaikam bar jylla ba kin don ia ki Service Licence na ka bynta ka jingthungkam ia ki bar jylla kiba dei na Jylla.
“Na ka bynta ka South Shillong Advisory, Ngi wanrah sha ka jingpyntip ba kyrkieh sah phi ia ka jingsngewkhia kaba jur haba iadei bad ka Khasi Hills Autonomous District (Trading by Non-Tribals) (Amendment) Bill, 2026,” ula thoh.
“Ka dei ka jingpynpaw jong ngi ba kane ka Bill kala tam palat ia u pud ka jingtreikam jong ka Council” ong u Bah Sanbor haba pynpaw ba ka KHADC kala jam palat ia ka bor treikam kaba la pynkup hapoh ka Paragraph 10 jong ka Sixth Schedule.
“Kane ka Bill kaba la mynjur da ka KHADC ka long palat ia ka bor thaw ain bala pynkup sha ki Autonomous District Council hapoh ka Paragraph 10 jong ka Sixth Schedule ka Riti Synshar bad kumta ka long pyrshah ia ka Riti Synshar ka Ri India” ong ka shithi.
Ula pynksan ba ka Ain ba nyngkong u snem 1954 ka dei kaba kren beit thik tang ia ka jingbuh kyndon ha ka khaii pateng.
“Ka Khasi Hills Autonomous District (Trading by Non-Tribals) Regulation Act, 1954 kala long ain ban pyrrkhing ia ka kam khaii da ki bar jylla bad haba pyntreikam ia ka, ki nongkhaii bar jylla haduh mynta kila bud ia ki ain bapher bapher bad ki kyndon bala pyntreikam da ka Sorkar Jylla bad ki District Council” ong u Bah Sanbor.
“Da ka jingpyrshang ban pyniar ia u pud ban pyniaid naduh ki nongkhaii shimet sha ki kompani/ki nongtrei shimet, ka KHADC kala jam sha u pud ba long shabar ka jingaibor ka Riti Synshar ka Ri” ula ong haba bynrap ba ka jingai jingmynjur ia kane ka Amendment Bill kan buh ia ka Council ha ki jingma ban shah mudui mukotduma.
Haba khring ia ka jingmut jong ka Paragraph 12 A jong ka Sixth Schedule, u Bah Sanbor ula pynpaw ba ki Ain ka Sorkar Jylla ki ieng bad ki ain jong ki District Council ki iap noh lada ki iatyngkhuh.
U Bah Sanbor ula ieng skhem ha ka nongrim ba kane ka Bill ka pynkhein ia ka hok tynrai jong ki nongshongshnong.
“Ka jinglah ban pyntreikam ia ka Trading By Non Tribals kam dei satia ban long shaduh u pud ban pyniaid ia ka jingiadei hapdeng ki nongaikam bad ki nongtei. Kane ka Bill ka dei ka jingpynkhein ia ka Article 14, Article 19 (1)(g) bad Article 21 jong ka Riti Synshar ka Ri India” ula ong.
U Bah Sanbor ula kam ruh ba kane ka Bill ka dei kaba la shna tang ban myntoi ha ki kam sain pyrthei.
“Kala paw shai ba ia kane ka Bill la wanrah tang ban myntoi ha ka kam sain pyrthei, haba kyntait ia ka jingshisha ba kam lah ban iaid lait ia ka jingshah bishar kat kum ka riti synshar” ong u bah Sanbor.
Haba kyntu ia u Lat ba un tuklar, u Bah Sanbor ula ong “Halor kine ki jingshisha bad ki jingshong ain bala pynpaw haneng, ngi kyrpad ia ka Ophis jong phi ban bishar bha ia ka jingbym biang kat kum ki ain, ka jingbym don bor ban thaw ia kane ka ain, bad ka jingpynkhein ia ka Rit Synshar bad khatduh ban sangeh ai jingmynjur ia ka Khasi Hills Autonomous District (Trading by Non-Tribals) (Amendment) Bill, 2026.”
 (Amendment) Bill, 2026, haba pynpaw ba kane ka Ain ka long pyrshah ia ka Riti Synshar bad shabar u pud treikam ka KHADC.){kind=link}