Shillong, Jylliew 29: Ka Hynniewtrep Youth’ Council (HYC) Shella Area Unit, Umwai Unit bad ka Jatap Unit, kila pynkup burom ïa ki 32 ngut ki samla pule na ka thaiñ Ri-War Shella kiba la leh bha haka eksamin SSLC 2026.
Ia kane ka jingpynkupburom la leh ha ka prokram Tur Shaphrang Academic Excellence Award kaba la long ha St. Ursula Border Area Higher Secondary School, Mawlong.
Iaki samla pule la pynkupburom da u President ka HYC Central Executive Council u Bah Roy Kupar Synrem u la wan ban ia shim bynta kum u kongsan.
Ha kane ka prokram la wan ban ïashimbynta da ki khynnah skul, ki nonghikai na ki skul bapher bapher, ki kmie ki kpa bad ki riew rangbah naki shnong bapher bapher.
Haba kren haka jingialang, u Bah Roy u la ai khublei ia ki nongshah pynkupburom halor ka jing leh bha jong ki haka eksamin.
U Bah Roy ula ai ka jingiaroh ia ki samla pule na ka bynta ka jingtrei shitom jong ki, ka jingkut jingmut bad ka jingaiti lut, bad u la iaroh ruh ia ka jingtrei shitom jong ki kmie ki kpa, ki nonghikai kiba la iarap ia ki samla pule ban poi shaka jingjop.
U la kyntu ia ki samla pule ba kin iai bteng ia ki jingpule kiba kham shalor bad ban iai bteng ban ialeh ban long kiba tbit ha baroh ki liang jong ka jingim.
Haba ai jingkren ha kane ka jingialang, u Rangbah Shnong ka shnong Shella u la ban jur ia ka jingdonkam jong ka jingnang jingstad, ka akor bad ka jingiaishah ha kaban sain dur ia ka lawei jong ki samla.
U bah Donbor Marbaniang u riew rangbah na ka Shnong Tyrna u la ai jingkren ruh ha kane ka sngi, ha kaba u la ai mynsiem ïa ki samla pule ba kin ïaineh ha ka jingpule jong ki katba ki dang bat ïa ki jinglong tynrai bad ki riti dustur.
Ia kine ki 32 ngut ki khynnah skul na ki skul bapher bapher jong ka thain Ri-War Shella la sam daki momentos bad ka pisa kum ka jingithuh ia ka jinglah jong ki ha ka eksamin SSLC 2026.
 Shella Area Unit, Umwai Unit bad ka Jatap Unit, kila pynkup burom ïa ki 32 ngut ki samla pule na ka thaiñ Ri-War Shella kiba la leh bha haka eksamin SSLC 2026.){kind=link}