Shillong, Jylliew 29 : U MLA ka BJP Bah AL Hek ha ka sngi Nyngkong ula ong ba u Myntri Rangbah Duh Narendra Modi, ula phah da u lain ia ki Myntri ka Sorkar Pdeng sha Meghalaya ha ryngkat ki song kam pynroi, bad mynta ka shong ha ka Sorkar Jylla ban pynthikna ba la pyntreikam hok ia kine ki skhim.
“Nga kwah ban ai khublei ia u Myntri Rangbah Duh namar ka jingphah da u lain ia ki Myntri ka Sorkar Pdeng sha Jylla ha ryngkat ki song kam pynroi. Mynta ka dei ka jingkitkhlieh jong ka Sorkar Jylla jong ngi ba kan pyntrei ia kine ki song kiba la phah da ka Sorkar NDA” ong u Bah Hek haba iakren bad ki nongthoh khubor.
Haba kam halor ka jingkam burom ka NPP na kine ki skhim ka Sorkar Pdeng, u Bah Hek ula ieng skhem ba ka thymmei jong kine ki skhim ka long kaba shai bha.
“Kano kano ka seng sain pyrthei ka lah ban shim ia ka burom, hynrei baroh ki tip ba kine ki skhim baroh ki wan na u Myntri Rangbah Duh ka BJP. U dei u Myntri Rangbah Duh jong ka NDA, u dei na ka BJP. Kumta, kaei kaba lah leh ka dei namar ka jingkyrkhu jong ka BJP kaba don ha ka Sorkar Pdeng” ula ong.
Ula ban jur ba ka jingpyntreikam ka shong mynta ha ki tnad ba dei khmih jong ka Sorkar Jylla
“Lada ki skhim ki wan na ka tnad PWD, ka tnad PWD ka don la ka jong ka rukom pyntreikam ia ki kam. Haba wan na ka tnad ka Koit ka Khiah, kane ka tnad ka don la ka jong ka rukom ban pyntreikam ia ki” ula batai.
Haba kyntait ia ki jingkynthoh ba ka jingtuid jong ki song jingiarap ka Sorkar Pdeng ka dei kaba la pyn iahap por bad ka elekshon, u Bah Hek ula ong “Kam don jingiadei eiei ruh em bad ka elekshon. Kane ka dei ka kam pynroi. Ka kam pynroi ka jia ha kano kano ka por. Ngi la iakhmih ia ka jingwan bun ki kam pynroi sha Meghalaya, khamtam ha ka kam jngohkai, kam ialehkai bad ka koit ka khiah”.
