Shillong, Risaw 05 : Ka jingbym lah jong ka Tnad Transport ban pyntreikam ia ka dor thymmai jong ka kuna na ki kali ba khlem siew kuna, kala lam sha ka jingioh lum duna ia ka kuna kaba kot haduh T. 1.23 klur.
“Namar ka jingbym leh eiei jong ka Tnad Transport bad ki Enforcement Inspector ban pyntreikam ia ka dor thymmai jong ka kuna naduh bala pynmih jingpynbna ka Sorkar Jylla, kala lam sha ka jingduh ei ia ka pisa ba T. 1.23 klur sha ka pla tyngka ka Jylla” ong ka Comptroller and Auditor General of India (CAG) ha ka kaiphod.
Ka ong ba ha ka jingbishar ia ki kot ki sla jong ka Commissioner of Transport, la paw ba ka dor thymmai jong ka kuna kat kum ka Motor Vehicle (Amendment) Act (MVAA) ka dei kaba la pynmih jingpynmih da ka Tnad Transport ha ka 16 tarik Nailur 2019 , kaba long hadien 15 sngi.
Na ka jingbishar ia ka kaiphod bala aiti da ki Enforcement Inspector jong ki hynniew tylli ki weighbridge/check post ka Commissioner of Transport jong u bnai Nailur 2019 bad Risaw 2019, la paw ba wat hadien bala buh ia ka dor thymmai ia ka kuna ha ka 16 tarik Nailur 2019, ki Inspector ki khlem pyntreikam satia ia kane ka dor thymmai.
Ka Ophis u Commissioner of Transport ha ka jubab bala phah ha u Naiwieng 2020, kala ong ba ki Inspector kim shym la lah ban pyntreikam ia kane ka kuna khlem da ioh ia ka jingbthah na ka Sorkar Jylla namar ka lah ban wanrah iaka jingialeh pyrshah na ki paidbah.
Ka Ophis u Commissioner of Transport kala ong ruh ba bun na ki nongpynkhein ain ki dei kiba biej ba them bad ki bym don jingtip satia ia ka dor kuna ba thymmai. Ki ju kyrpad da ka aidaw ba kim don jingtip bad la hap ban pynbeit ia ka jingsiew da ka dor kaba rit khnang ba kan nym wanrah ruh ia ka jingdheng kali.
Ka CAG ka ong, ba kane ka jubab kam iahap satia namar ka dor thymmai jong ka kuna kam dei kaba la pyntreikam mardor da ka ophis ki DTO lane ki Enforcement Inspector war hadien bala ioh jingbthah na ka Sorkar Jylla.
Ka CAG ka ai jingmut ba ka dei ka kamram jong ka Tnad ban pynmih ia ki jingpynbna paidbah halor ka jingpynkiew dor iaka kuna lyngba ki lad pathai bapher bapher ka ban long kum ka sienjam ha kaban lah pyntreikam bha iaka ain.
Ia kane ka kam la dep ban pyntip sha ka Sorkar Jylla ha u bnai Nohprah 2021 bad mynta ka Ophis ka CAD ka dang ap ia ka jubab.
