Shillong Jylliew 27: Ka Shillong Traffic Police, kum shi bynta jong ka Operation Safer Shillong kala pynlong ia ka jingkhynra bad jingkhmih bniah ha ka miet jong ka Sngi Thohdieng ia ki nongniah kali ha kaba kila ioh ban bat haduh 80 ngut bad dain kuna T.81,500.
Katei ka jingkhynra ka long da ka jingthmu ban lah ban pynduna ia ki jingaksiden ha ki surok bad ia kane ka Operation Safer Shillong, la pynlong da ka Shillong Traffic Police bad ka Special Operation Team (SOT) ryngkat ka jingioh jingkyrshan na ki dkhot jongka Dorbar Shnong Laitumkhrah ha kaba ki pulit kila leit ban ap ha kylleng ki jaka jong ka nongbah.
Ki pulit kila pynleit jingmut ha ki nongniah kiba la shongshit khawiang, ka jingshna ne modify be-aiñ ia ki kali bad ka jingpynkhein ia ki kyndon niah kali ha kaba kila lap ba kila don 80 ngut kiba la pynkhein ia ki kyndon bad la ioh ban dain kuna na ki kaba la kot T.81,500.
U SP ka East Khasi Hills u Bah Vivek Syiem, ula pyntip ba kila bat noh ia nongniah kiba ka shoh khawiang bad ym shim la shah shuh ia ki ba kin bteng ban niah kali bad la pyllait noh ia ki hadien ba la wan ki briew kiba la shim ia ka jingkitkhlieh ban ialam noh ia ki sha iing.
Ula ong, ba kane ka jingkhynra ha ki sngi ba kut jong ka taiew kan iai bteng man la ka por hapoh jong ka Operation Safer Shillong da ka jingthmu ban don ka jingniah kali da ka jingkitkhlieh bad ym da ka jingshoh khawiang da kaba bud ryntih ia ki kyndon niah kali khnang ba ki jingim ha ki surok kin long kiba shngain.
Ka STP kan ialeh ha kaban pynlong ia ka nongbah Shillong kaba lait na kino kino ki jingjia kiba sngewsih ha ki surok.
