Shillong, Risaw 05: Ka seng Congress kala pynkhreh ban pynieng da u MLA barim ka Mawphlang bad Nongialam ka BJP Bah J.A Lyngdoh kum u kyrtong ka seng ban iakhun iaka elekshon MLA 2023 na North Shillong Constituency.
Katkum ki khubor bala iohlum na ki katto katne ki nongialam ka Congress la pyntip ba kadei ka jingshisha ba kala don ka jingiapynbeit bad mynjur ban pynieng da u Bah JA Lyngdoh na North Shillong Constituency hynrei shwa ban poi sha kane ka bynta u Bah Lyngdoh yn hap ban pyniasoh shwa ialade bad ka Congress.
Ki nongialam ka Congress kila pynpaw ba ka North Shillong Block Congress Committee (NSBCC) kan pdiang ia u Bah JA Lyngdoh haka 7 tarik mynta u bnai ha kaba yn pynskhem syndon ia ka kyrteng jong u kum u kyrtong ban iakhun iaka elekshon MLA.
Kila pynpaw ruh, ba ki don iaka jingkyrmen kaba skhem ba u Bah Lyngdoh yn jop iaka elekshon khamtam haba une u rangbah ha ka elekshon MLA 2018 ula ieng na ka seng BJP bad ula wan ba-ar bad ula rem ruh tang khyndiat vote ha u Bah Adelbert Nongrum uba long u kyrtong ka KHNAM.
“Ki jingiakren kila dep iaid shakhmat bad ngi la ia poi sha ka jingiasngewthuh jingmut bad kaba sngewtynnad ka long ba u Bah JA Lyngdoh ula mynjur ban pyniasoh ialade bad ka Congress ban iakhun iaka elekshon MLA” la ong u nongialam ka Meghalaya Pradesh Congress Committee (MPCC).
Kumba long mynta ki kyrtong kiba la thikna ban iakhun iaka elekshon MLA na North Shillong ki kynthup ia u Bah Adelebert Nongrum naka VPP, Bah Ransom Sutnga na ka NPP, u Dr Aman War naka UDP, Kong Elgiva Rynjah naka AITC, u Pastor Kyrsoibor Pyrtuh na ka kynhun Kam katba ka seng BJP bad kiwei pat ki seng,haduh mynta kim pat pynbna iaki kyrtong kiban aireng ia ka elekshon.
