Shillong, Jylliew 25: Palat 30 ngut ki samla na ka shnong Shkenpyrsit bad ki shnong kiba na Amlarem Subdivision, kila shah pynkup burom ha ka sngi Palei, hadien ba kila pyndep ia ka jingioh jinghikai ne ka Training Programme on Agri-tourism, ka ba-ar bnai ban pynkup bor ia ki samla ka thaiñ kum ki Tourist Guide ban ialam ia ki nongjngohkai ha ka jaka kaba don ka Phe Waterfall ne Kshaid Phe.
Ka Society for Urban and Rural Empowerment, SURE, kala pynlong ia kane ka jingai jinghikai ban tei ia ka sap ka phong ia ka shnong kaba don ia ki jaka jngohkai. Kine ki samla kiba la pyndep ia ka jingioh jinghikai kila ioh pdiang ia ki sertiphiket bad ki ID Card ha katei ka jingialang kaba la long ha Shkenpyrsit, kawei na ki jaka jngohkai kaba pawnam bha hapoh Amlarem Subdivision.
Ka Kongsan ha kane ka jingialang ka SDO Civil, Amlarem Subdivision ka V. Kezo, kala ong, ba kine ki samla ki don ia ka jingkitkhlieh nalor ka jingialamkai bad ai jingbatai ia ki nongjngohkai.
“Ki nongjngohkai ki ju sngewtynnad ia ki jaka lyngba ka jingiakren bad ki Tourist Guide kiba na ka shnong. Kumta ka long kaba kongsan bha ban nang ban iakren bad ban ai ia ki nongjngohkai ia ki jingtip kiba paka shaphang ka kolshor, ka riti ka dustur bad jingdon jingem tynrai kiba la hiar pateng” kala ong.
Kala ai khublei ruh ia ki bad pynpaw ia ka jingkyrmen ba ka Amlarem kan nang kiew kum kawei na ki jaka jngohkai kaba kongsan ha ka jylla Meghalaya bad kan plie ha kaban thaw ia ki lad iohkam iohjam na ka bynta ki samla trai shnong.
U District Tourism Officer Bah R. Wahlang ula ong, ba ka Jaiñtia Hills, kynthup ia ka Amlarem, ka don ia ka lad kaba paka bha ban kyntiew ia ka kam jngohkai.
“Ka sorkar ka dang shim ia man la ki sienjam ban kyntiew ia ka kam jngohkai bad ban pynurlong ia ka jingangnud jong ki paitbah” ula ong.
U Bah L. Suchen, District Skill Development Officer, ula pynpaw ba ka Meghalaya kaba don bun bha ki samla bad ka jylla kala pynleit jingmut ha ki prokram ban tei ia ki sap ki phong bad ula iaroh ia ka SURE kaba la ialam na khmat halor ka jingtrei kaba iadei bad ka Agritourism bad Skill Development ha ka jylla.
Katba u Bah H.H. Mohrmen u Secretary jongka SURE, ula ong ba ka shnong ka thaw ka lah ban kamai jakpoh lyngba ka Agritourism katba ka dang iada ia ki jingdon jingem bad ia ka spah kaba iadei bad ka kolshor tynrai.
Ula pynpaw ia ka jingkyrmen ba kane ka nuksa kan dei kaba la pynbud ruh ha kiwei pat ki bynta jong ka thain.
Nalor kane, la ioh ruh ia ka jingkren na u Project Coordinator Bah Riwan Lyngdoh, SURE Centre Manager, Arwaka Shylla bad u Chairman ka Dorbar Shnong Shkenpyrsit Bah Affi Lyngdoh.
Ka Phe Waterfall kadei ka jaka kaba la khring bha ia ki nongjngohkai bad ki ophisar kila ong ba kine ki samla kiba la ioh ia ka jinghikai pyntbit kin iarap shibun ban kyntiew ia ka kam jngohkai ha Shkenpyrsit ha ka lynti kaba long ryntih kaban long ruh kum ka jingplie ia ka lad ban kamai kajih ka shnong ka thaw.
