Shillong, Jylliew 26: Kum ka jingai mynsiem ia ki samla ba kwah ialeh iaka eksam Civil Service, ka Sorkar Jylla kala khot aplikeshon na ka bynta ka Residential UPSC Coaching Programme bym donkam siew pisa, na ka bynta u snem 2026-27 batch, da kaba tyrwa haduh 60 tylli ki seat sha ki kyrtong ba lah ban aplai napoh ka Jylla.
Ka prokram, ka ban pynlong lyngba ka Meghalaya Administrative Training Institute’s Administrative Services bad Public Examination Training Centre (MATI-AISPETC), ka thmu ban pynkhreh ia ki kyrtong ba shah jied na ka bynta ka eksam UPSC Civil Service, kawei na ki eksam ba eh tam hapoh ka Ri.
Kane ka prokram ba neh shisnem lynter kan ai ia ka Coaching, jaka sah bad ka bam hapoh ka MATI Campus kaba don ha Mawdiangdiang, Shillong. Ka jingshim klas kan long da ka ktien English.
Kane ka 60 seat kan dei beit thik tang ia ki nongshongshnong ba pura ka Meghalaya kiba lah ban iakhun ia ka eksam UPSC Civil Services (Prelim), 2027.
Ka Admission kan long lyngba ka jingpass bha ia ka entrance test kaba long kat kum ka eksam UPSC Civil Service Preliminary. Ka Institute ka pyntip ba ia ki jingtip ba bniah halor ka eksam yn sa pynbna la ka jong.
Ban lah aplai ia kane ka prokram, ki kyrtong ki dei ban long kiba la kynjoh 21 snem shaneng bad don ia ka bachelor degree ba 50 percent ka aggregate marks. Ki kyrtong kiba la dep teng ia ka coaching ha MATI kin ym lah shuh ban aplai.
Ka sngi ba khatduh ban aiti ia ki aplikeshon ka long 30 tarik Jylliew 2026, bad ki kyrtong kiba kwah kilah ban aplai online lyngba ka registration link bala ai lane da kaba scan ia ka QR code bala ai hapoh ka jingpynbna.
Kane ka sienjam ka dei shibynta jong ka jingpyrshang ka Sorkar ban pynroi ia ka sap bad ban ai ia ka coaching jong ka Civil Service kaba lah ban ioh da ki kyrtong kiba dei hok ban ioh.
