Nongstoiñ, Risaw 5: Haduh 69 tylli ki Shnong kiba hap hapoh ka Langpih Sector, kila rai ba da lei lei ruh em kin ym leit sha ka Jylla Assam ha ka jingiapynbeit pud jong ka wat kaba ar hapdeng ka Sorkar Meghalaya bad Assam.
Ia kane la pyntip da uwei na ki riew rangbah ka Langpih Bah Dominic Wahlang uba la pyntip ba baroh ki shnong Khasi bad Garo, kila dep shim rai ba kin dawa ban iai neh beit ha ka Jylla Meghalaya ha kane ka jingiakren pynbeit pud.
“Ki Shnong Khasi bad Garo kila sdang ioh mynsiem bad sngew shngain ba kan don noh ka jingiapynbeit pud kaba thikna ia u pud u sam ha Langpih. Hynrei ki Shnong Khasi bad Garo kila dep rai ban iai dawa n aka Sorkar Jylla ban iasaid jur ba kin neh beit ha Meghalaya” ula ong.
Kat kum ka jingiathuh jong u, u Syiem ka Hima Nongmynmaw ula register ia ki jaka bad ki nongrim rim jong ki briew bad ki shnong ki thaw. Ula pyntip ba na ka liang ki paralok Garo jong ki shnong bapher bapher, mynta ki la rai kut ba kin ym leit sha Assam da lei lei ruh hynrei kin sah beit ha Meghalaya.
U la їathuh ruh ba ka daw kaba pynlong їa ki paitbah Garo ban shim ia kane ka rai ka long eh hadien ka jingpyn bna ka Sorkar Assam ban ai tang lai bikha ka jaka ia kawei pa kawei ka Longiing katba baroh ki kper ki phrah bad ki jaka ba lait kin dei jong ka sorkar Jylla.
U la ong ruh ba dei halor katei ka nongrim ba ki paitbah garo ha kine ki sngi, ki la sdang ban khih khohreh bad pyneh triang ba kin ym leit sha Assam da lei lei ruh. Lada ki ar sorkar kim sngap їa ka jingkwah jong ki, ki jingeh kiba bun ki lah ban mih hadien ha bud.
