Ïasyllok halor ka Surok Khappud, jingpyniar ia ka Shillong Airport bad ki projek kiba kongsan
Shillong, Jylliew 21: U Myntri ka tnad Ïada ri u Rajnath Singh ula iashimbynta lang bad ki shipai bad ki ophisar ka jylla ha kaban rakhe ia ka International Yoga Day ha Eastern Air Command ha Shillong hynne ka sngi u Blei, ha kaba ula iashimbynta lang ha ka jingialang leh Yoga.
Haba iakren bad ki nongthoh khubor, u Myntri Rangbah ka Jylla u Conrad K. Sangma ula ai khublei ia u Myntri Rangbahduh ka ri u Narendra Modi uba la lamkhmat ia ka jingrakhe ia ka International Yoga Day bad pynpaw ruh ia ka jingsngewnguh ia u Myntri ka tnad Ïada ri uba la wan ban iashimbynta ha kane ka prokram ha Shillong.
U Myntri Rangbah ula pynpaw ia ka jingmyntoi na ka jingleh Yoga bad ong, ba kane ka rukom leh kadei kaba iarap bha ia ka jinglong jingman, ka jingsting bad ka jingbha ha ka met ka phad baroh kawei. Ula pynshlur ia ki paitbah khamtam ia ki samla ban pynlong ia ka jingleh ia ka yoga kum shi bynta ha ka jingim kaba man la ka sngi ka jongki.
Hadien kane ka jingleh yoga, u Myntri Rangbah ka Jylla bad u Myntri Ïada ri kila iakren halor kiba bun ki mat jong ki jingtei kiba kongsan ha ka jylla kiba donkam ia ka jingiatreilang bad ki bor shipai ryngkat ka Ministry of Defence.
Ki katto katne ki mat kiba kongsan kiba pynsngew ki kynthup ia ka jingpyniar ia ka Shillong Airport bad ia ka Four-Lane Road Project ka pyniasoh ia ka nongbah Shillong haduh Barik Point. U Conrad Sangma ula ong, ba ka Ministry of Defence kala ai ia ka jingkyrshan na ka bynta kitei ki ar tylli ki sienjam.
Ka mat kaba kongsan bha jong ka jingiakren kadei ka jingtyrwa ia ka surok kaba pyniasoh hapdeng ka Ranikor bad Ratacherra ha shi lynter ka khappud jongka India-Bangladesh. U Myntri Rangbah ula kyntu ia u Myntri Ïada ri ban pynbna ia katei ka bynta kum ka ‘Strategic Road’ da kaba kdew ba kane ka long kaba kongsam tam na ka bynta ka jingshngain jong ka ri bad ia ka roi ka par jong ka thaiñ.
U Sangma ula ong ba ka jingpyniasoh na Ranikor sha Dalu kadei kaba lah dep pynwan ha ki wat bapher, da kaba pyniasoh ia ka lynti sha ka NH-217 bad NH-127B bad nangne da kaba iaid lyngba ka Phulbari-Dhubri Bridge Corridor shaduh Silchar. Hynrei ka bynta jongka Ratacherra-Ranikor kadei kaba ym shim la don satia kano kano ka jingkyntiew.
Ula banjur ba da ka jingshna pyndep ia ki jingpyniasoh kiba la leh klet kan pynkhlain shuh shuh ia ka lad pyniasoh ha khappud, pynsuk ia ka leit ka wan ki paitbah bad ka jingkit ia ki mar ki mata bad kan long ruh kum ka jingshakri na ka bynta ka bha ka miat jong ka jingai jingiada bad jingshngain ia ka thaiñ.
Katkum ka jingong u Myntri Rangbah, ula iathuh ba u Rajnath Singh ula pynpaw ia ka jingsngewtynnad halor kane ka jingtyrwa bad ula pynthikna ba ia kane ka mat kan dei kaban sa ioh ia ka jingai jingmynjur.
U Sangma ula pynpaw ba ia kane ka mat, kham hashwa ula dep ban iakren bad u Myntri ka Sorkar Pdeng uba khmih ia ka Ministry of Road Transport and Highways u Nitin Gadkari, uba la banjur ia ka jingkongsan ban ioh ia ka jingkyrshan na ka Defence Ministry na ka bynta kane ka projek.
Lada ioh jingmynjur, kane ka jingtyrwa ia ka Strategic Road la khmih lynti ba kan kyntiew ia ki lad pyniasoh ha ki thain khappud ka Meghalaya bad kan long ruh kum ka bynta kaba kongsan ha kaban ai jingiada ia ka ri bad ka khyrdop ka ioh ka kot ia ka thaiñ shatei lammihngi.
