Shillong, Jylliew 20 : U Myntri Rangbah ka Jylla Conrad K Sangma ula iakynduh hi dalade ia ki Cook-cum-Helpers jong ka PM-Poshan scheme kiba dang iakhih ha ka sngi Saitjain bad kular ha ki ba un sa khmih bad leh eiei ia ka jingdawa jong ki ba iadei bad ka honorarium.
Kine ki nongtrei kila pynlong ia ka jingiakhih da kaba rah placard shabar jong ka Couryard by Marriott, Shillong, kaba jia ryngkat ruh ha ka por ka jingwan iuhkjat ka Myntri Pla Tyngka ka Ri Nirmala Sitharaman. Kine ki nongiakhih kila dawa ban pynkiew ia ka bainong ba man la u bnai kaba la shu sah khlem pynthymmaishuh mynta ka jan 20 snem.
Katba ka jingiakhih ka dang iaid, u Myntri Tangbah ula hiar ban iakynduh iaki nongiakhih bad iakren markhmat bad ki nongialam jong ki.
Ka nongialam ka union Gena Nengnong, kaba lamkhmat ia ka jingiakhih, kala kdew ba wat hapdeng ka jingai jingshakri hapoh ka PM-Poshan Scheme la arphew snem, kam shym la don satia ka jingpynkiew ia ka honorarium.
Ki nongtrei ki ioh mynta tang T.900 shibnai bad kila kyntu ia ka Sorkar ba kan pynkiew noh sha ka T.9000 shibnai, haba ldew ia ka jingkiew dor kiei kiei baroh.
Hadien ka jingiakynduh, ki dkhot ka Union kila pynpaw ia ka jingkyrmen ba ia kane ka mat jingdawa bala slem jong ki, kan ioh ia ka jingshimkhia na ka liang ka Sorkar Jylla bad Sorkar Pdeng.
