Shillong, Jylliew 20: Ka Myntri ka Sorkar Pdeng kaba khmih ia ka Pla Tyngka bad Corporate Affairs ka Nirmala Sitharaman ha ka sngi Saitjain, kala plie ia ka surok Jowai–Nartiang–Kdiap–Khanduli (JNKK) ha ka jingiialang kaba la long ha Wahiajer Football Stadium,West Jaintia Hills district.
Kaba la tei hapoh ka jingkyrshan jong ka New Development Bank ha ka jinglut jingsep kaba kot palat T.59 Klur, kane ka projek surok kadei kaba la khmih lynti ban pynkhlain ia ki lad pyniasoh ha ka thain, ban suk ka poi sha ki iew ki hat bad ia ki jingshakri kiba kongsan bad ban kyrshan ia ka kamai kajih ha kylleng ki bynta jong ka West Jaintia Hills district. La khmih lynti ruh ba kane ka jingshna pynbha ia ki surok kan kyntiew ia ki lad khaii pateng bad ban pynsuk ia ka leit ka wan jong ki paitbah.
Haba kren ha ka jingialang, ka Sitharaman kala banjur ia ka jongkongsan ia ka jingdon kyrdan ki jingtei ha kaban kyntiew ia ki kam pynroi bad ban pynthikna ba ka jingmyntoi jong ka roi ka par kan poi sha baroh ki bynta jong ka ri kynthup ia ki thain nongkyndong bad ia ki jaka ha khappud.
Ka Myntri Pla Tyngka kala iakren ruh bad ki samla pule jong ka Kiang Nangbah Government College, Jowai ha Wahiajer Football Stadium. Kaba la seng naduh u snem 1967 bad la ai kyrteng ban pynsah nam ia u nongiakhun laitluid ka ri u Kiang Nangbah, kane ka jaka pule kala leh ia ka bynta kaba kongsan ha kaban pyniar ia ka lad jingpule ha ka kyrdan Higher Education bad ban saindur ia ki samla kiba donsap jong ka thain Jaintia Hills.
Ha kane ka jingiakren, ka Sitharaman kala iakren bad ki samla pule halor ki mat ki bapher bapher ha kaba iadei bad ki samla, ka pule puthi, halor ki teknoloji, ki jingangnud ha ka jingim bad ban tei ia ka ri.
Ki samla pule kila pynpaw halor ka Higher Education, ki lad iohkam iohjam, Financial Literacy, jingseng kam lajong bad ka kamram jong ki samla ban saindur ia ka lawei jong ka ri India.
Ha kane ka jingiakren, la iatai ruh halor ka jingioh ia ki lad kaba la thaw da ka jingiaid sted ki kor teknoloji bad ka jingkongsan ban ioh ia ki jingpyntbit ha kaban wanrah ia ka jingkylla ia ka mariang ha ka pyrthei baroh kawei.
Haba pynshai halor ki jingpynsngew jong ki samla, ka Myntri Pla Tyngka kala pynshlur ia ki ba kin long kiba wad ia ki jingtip, kiba shaniah skhem halade bad ban batskhem ha ka nongrim ban iai bteng ban pule.
Kala kren ruh halor ka jingkongsan jong ka rukom pyrkhat kaba ngam jylliew bha, ban ioh ia ki jingtip halor ka jingshim ia ki rai bad ban pyndonkam ha ka rukom kaba dei ia ki kor teknoloji.
Kala banjur ba ki samla mynta kila ioh bun bah ki jingtip bad ia ki kabu, ka la kyntu ia ki samla pule ba kin pyniaid ia ka bor ka jongki sha ka jingleh ia ki kam kiba dnag long thymmai, ban shakri ia ka imlang sahlang, ka jingiashimbynta da kaba don jingmut ha ka jingkyntiew ia ka roi ka par ha ka jingiaid lynti ka ri.
Kala banjur ia ka jingkongsna ban don ia ka jingkitkhlieh ha ka jingpyndonkam ia ki teknoloji, kala kyntu ia ki samla ba kin leh da kaba adkar, ban pyrkhat bniah bha bad ban pan ia ka jingbtin na ki kmie ki kpa, nonghikai, kiba lah heh bad ki paralok hashwa ban ai ia kano kano ka jingpynsngew ne jingpynpaw halor kino kino ki jingtip.
Hadien kane, ka Myntri Pla Tyngka kala iakren bad ki khynnah skul bad ki nongialehkai ha Wahiajer Football Stadium.
Kala pynpaw ia ka jingsngewhun ha kaba iadei bad ka rukom tei ia kane ka Stadium, ka Sitharaman kala ong, ba kane ka jingtei jong ki paidbah kadei kaba don ia ka kyrdan kaban ai jingmyntoi ia ki samla jong ka pateng ban dang wan kiba don ia ka jingthrnag ban kiew shaphrang ha ka kam ialehkai.
Kala pynpaw ba kane ka jingtei kala sdang ban khring ban pynlong ia ki jingialehkai ki bapher bapher bad ka jingiashimbynta jong ka imlang sahlang, kaba pyni ia ka jingkordor ia ki paitbah ka Meghalaya.
Kala pynshlur ba dei ban pyndonkam pura ia kane ka jingtei, kala ong ba kum kane ka jingbei tyngka kadei ban shakri kum ka Centre jong kaj ingiashimbynta lang ka shnong ka thaw, ban tei ia ki sap ki phong bad ban kyntiew ia ka kam ialehkai.
Ka Wahiajer Football Stadium kadei kaba la tei ha ka jinglut jingsep kaba kot palat T.65 Klur lyngba ka jingkyrshan na ka Ministry of Finance’s Special Assistance to States for Capital Investment (SASCI) Scheme, hapoh jong kane, ki jylla kila ioh ia ka ram kaba lait na ka jingsiew ia ka sut haduh 50 snem.
Kane ka jaka ialehkai kaba don ha ka jaka kaba heh haduh 16 akar ha West Jaintia Hills district, ka sports complex kala wanrah ia ki jingtei halor ki jingialehkai kiba don ia ka kyrdan ha ka pyrthei sha kane ka thain bad la khmih lynti ba kan pynshlur ia ki samla ba kin jam shakhmat ha kaban ioh jinghikai pyntbit, ban pyntbit kham bha ialade ban iakhun ha ki rynsan ha ka ri bad ha ka pyrthei.
Kane ka project ka pyni ba ka jingiohi jngai jong u Myntri Rangbah duh ka ri u
Narendra Modi ia ka roi ka par kaba salonsar lyngba ka jingbei tyngka ha ki jingtei, ban pynthikna ba ki jingtei katkum kane ka juk kaba mynta kin poi sha man la ki thain bad ban thaw ia ki kabu kiba thymmai na ka bynta ki samla ka ri India.
Ia kane ka Stadium la tei katkum ka jingbud ryntih bad ki kyrdan ha ka pyrthei. Ka madan football kan shakri kum ka jaka ialehkai kaba don ruh ia ka jaka mareh ne athletics track bad kine ki jingtei baroh ar kidei kiba la iaid bad pyndep katkum ka FIFA bad ka jingdonkam jongka World Athletics. Ki bynta kiba kongsan ki kynthup ia ka synthetic football turf, Eight-Lane 400-metre World Athletics-Certified Synthetic Track, Ka Athletic Track kaba beit haduh 100 mitar bad ka jaka shong jongki nongpeitkai.
La kynthup ruh ia ki jingtei kiba kyrpang na ka bynta ka Long Jump, Triple Jump, Pole Vault, Steeplechase, Javelin Throw, Shot Put bad ia ka Discus Throw.
Kaba don ia ki jaka shong ia palat 6,000 ngut ki nongpeitkai, la khmih lynti ba kane ka stadium kan long kum kawei na ki shlem ha kaban pynlong ia ki jingialehkai hapoh Meghalaya bad ia ka thain ba iar jongka North Eastern Region, da kaba plie lad ia ki nong ia mareh ban ioh ia ki jinghikai pyntbit bad ki lah ban iakhun ha ryngkat bad ka kyntiew ia ki jingialehkai bad ia ka kolshor ha ka kam ialehkai hapdeng jong ki samla.
 ha ka jingiialang kaba la long ha Wahiajer Football Stadium,West Jaintia Hills district.){kind=link}