Shillong, Jylliew 19 : Ka Myntri Pla Tyngka ka Ri Nirmala Sitharaman ha ka sngi Thohdieng kala pyntip ia ki nongthaw policy bad ki paralok ba don bynta ha ki kam pynroi, ba ka thain Shatei Lam Mihngi kala kylla na ka jingdon da u pud sha ka jaka pdeng jong ka roi ka par ka Ri India bad kan long kaba kongsan ban pynurlong ia ka thong jong ka Viksit Bharat hapoh u 2047.
Ka Sitharaman kala ong ia kane haba plie ia ka conference ba arsngi halor ka matpdeng “Leveraging Externally Aided Projects in North Eastern States” ha Shillong, kaba la pynlong da ka Department of Economic Affairs hapoh ka Azadi Ka Amrit Mohatsav.
Kane ka conference ka dei kaba la iashimbynta da ki Myntri Rangbah ka Jylla Meghalaya, Assam, Mizoram, Nagaland, Sikkim, Tripura nalor ki Heh Ophisar na ka Sorkar India bad ki nongmihkhmat na ka World Bank, ADB, AIIB, IFAD, NDC, JICA bad NITI Aayog.
Ka Sitharaman kala pynpaw ba ki Externally Aided Project kila long ki tyllong ba kongsan ha ka jingbei tyngka na ka bynta ka thain, jing bei tyngka ia ki surok, ki kam pynmih bording, kam sam um, kam jngohkai bad ki jingtei kiba donkam ha ka imlang sahlang.
Kala pynpaw ba ki jingeh ba shisha mynta kam dei eh tang ka jingioh pisa, hynrei ban tei ia ki Institution bad ka jinglah ban pyntreikam ia ka pisa, kaba lah ban pynkylla ia ka jingkynshew sha ki jingmih kiba neh shirta.
Halor kane, kala wer ia ka jingpyniadei ba kham jam hapdeng ka Sorkar Pdeng bad Sorkar Jylla, pynsted ia ka jingpyntreikam, bad iasam lem ia ki jingioh jinghikai hapdeng ki Jylla.
Ka Myntri Pla Tyngka kala ban jur ba ka bynta ban wan jong ka roi ka par yn sa pynwandur da ki briew bad ki jingiatehlok kumba la pynwandur da ka pisa.
Kala kdew ia ki samla ka thain, ka bor sengkam sengjam bad ki nongialam kynthei kum ki nongprat lynti bad kyntu ia ka jingkynshew kaba kham bun ha ka sap bad ki kam ba ialam da ki kynthei.
Kala kyntu ruh ia ki Jylla ban shim ia ki jingbei tyngka kiba wan na kiba bun ki liang, kum ka lynti ban ioh ia ki jingshemphang ka pyrthei bad ka buit treikam, ym tang ia ka pisa.
Ka Sitharaman kala kdew ruh ia ki kam kiba don bun ki lad ia ka jingkynshew kam ki riew shimet kiba lah ban aikam aijam bad kyntiew ia ka ioh ka kot kum ha ka kam jnghkai, kam pynpoi mar, kam rep, food processing, renewable energy, digital services bad kiwei kiwei.
Ka Myntri kala pyniasnoh ia kine ki kabu kum ka jingpyrshang ban pynjanai ia ka transport, digital bad kam bording haba pynpaw ba ki network kiba kham bha kin tehsong ia ka thain sah ki iew bad pynkhlain ia ka Act East Policy ka India.
Hynrei kala maham pat ba kane ka jingkiew ka dei ban kynthup lang ia baroh, ym ban don ki district ne ki Jaidbynriew ki ban shah ieh shadien bad ki jaka treikam kiba la pynwandur ban ai ia ki jingmyntoi hadien bala dep pyntrei ia ki project.
Ka sngi ba nyngkong jong ka conference kala sdang da ka technical session bala ai jingkren da ka DEA, World Bank, ADB bad NITI Aayog bad ki Jylla kila iasam ia ki ingshem na ki Project ba kila pyntrei hala ki jong ki jong ki Jylla.
