Shillong, Risaw 4: U Myntri ka Tnad Soil & Water Conservation Bah Hamletson Dohling hynne ka sngi ba-ar, ula buh mawnongrim ban tei ia ka Lummawbah Government Lower Primary School bad plie paidbah ruh ia kiba bun ki project jong ka Tnad Soil & Water Conservation bala pyntrei ha Lummawbah, Upper Shillong, ha ka jingialang bala pynlong ha Dorbar Shnong Lummawbah.
Haba kren ha ka jingialang, u Bah Hamlet ula ong ba kum u Nongshongsnnong jong ka Lummawbah, ka dei ka kamram jong ban ai ia ki kam pynroi kiba ai jingmyntoi eh ia ka shnong baroh kawei. Ula iaroh ia ka Executive Committee jong ka Shnong kiba la buddien ia ki skhim bapher bapher, kaba lam sha ka jingtreikam ki skhim hapoh Lummawbah.
U Bah Hamlet ula pynpaw ruh ia ka jingkmen da ka jingtei ia ka Building ba thymmai jong ka skul, kaba la treikam baroh shikatta ha ka Iingskul kaba la jot. Ula pynpaw ia ka jingkyrmen ba da ka jingdep ia kane ka jingtei, ka skul kan lah ban ai ka jingshakri kaba janai eh ia ki Khynnah jong ka Shnong bad kiba marjan.
U Myntri ula pyntip ruh ba ka jingtei mynta kala dep kumba 75% eiei bad kurmen skhem b aka skul kan sa shakri pura naka Iingskul ba thymmai ha u snem ban wan.
U Myntri ula pynpaw ruh ia ka jingkmen ban plie ia kiba bun ki prokect bala pyntrei lyngba ka Tnad Soil & Water Conservation kib aiadei bad ka jingsam umam umdih ia ka Shnong.
Ula pyntip ba palat 500 tylli ki longiing kin sa ioh jingmyntoi na ka skhim Jal Jeevan Mission kaban ai umbam umdih ha manla ki thliew iing jong ka Shnong. Ula kyrpad ia ki paidbah ba kin ai ka jingiatreilang bad ka Sorkar na ka bynta ka jing myntoi jong ka shnong baroh kawei.
Ki project bala pyntrei na ka Tnad Soil & Water Conservation ki kynthup ia ka RCC Dam Cum Water Distribution Chamber ha Sangmein, ka jingkieng iaid kjat ha Dongsohra, Lummawbah bad ka RCC Dam Cum Water Conservation Structure ha Lummawbah.
Ha kane ka jingialang, u Myntri ula aiti ruh ia ki kor computer sha ka skul Lummawbah Government Lower Primary School.
