Shillong, Jylliew 18 : Ka Khasi Hills Autonomous District Council (KHADC) kala rai ban khot hajir ia u nongshim wai ia ka Khasi Traditional Medicine Institute kaba don ha Lumsohpetbneng namar ka jingbym treikam bad ba kala nang jot.
“Ka Khasi Traditional Medicine Institute ha Lumsohpetbneng, bala tei ha ka jinglut ba T.9.5 klur, ka shu sah khlem treikam bad ka la jot” ong u Chief Executive Member Bah Winston Tony Lyngdoh hapoh ka Iingdorbar jong ka Council ha ka sngi Palei.
Haba jubab ia ka jingkylli u MDC ka Laban Bah Ricky Shullai, u Bah Winston ula ong ba ia kane ka Institute la aiwai ha u snem 2014 sha ka Centre Learning of Knowledge and Services, bala pyniaid da u Bah BG Byrsat, na ka bynta 20 snem ha ka jingsiew baiwai ba T.6 lak shisnem. Hynrei, ka Executive Committee kam pat ioh pdiang satia ia kano kano ka jingsiew na u nongshim wai haduh mynta.
“Haduh mynta, ka Centre kam pat treikam satia, kala sniew bha bad haduh mynta ym pat treikam eiei ruh em ha kane ka Centre” ong u CEM.
U Bah Winston ula ong ba ka EC kan sa khot hajir ia u Bah BG Byrsat ban iakren ha kaban pynthikna la u dang kwah ne em ban pyniaid ia ka Institute. Lada ym kwah, yn bthah ia une u nongshim wai ban aiti noh ia ka sha ka District Council. Ka Coyncil kan sa pan ruh ia ka baiwai bym pat siew. Ula ong ba naduh 2014 ym pat shym la siew baiwai wat shi tyngka ruh.
U CEM ula bynta ba ka KHADC kan wad ruh ia ki lad ki lynti kat kum ka ain ban shimti biang ia ka Institute bad ka lah ban ai show cause notice sha u Bah BG Byrsat lada um lah ban wan mih sha ka jingialang.
Ka Institute, kaba thmu ban kyntiew ia ka jingpynmih dawai kynbat, kala shu sah khlem pyndonkam naduh ba aiti mynta la palat shiphew snem, kaba pynsngewkhia ia ki dkhot halor ka jingbym pyndonkam ia ki jingtei kiba heh jong ka Council.
 kala rai ban khot hajir ia u nongshim wai ia ka Khasi Traditional Medicine Institute kaba don ha Lumsohpetbneng namar ka jingbym treikam bad ba kala nang jot.){kind=link}