Shillong, Jylliew 17 : Ka Khun Hynniewtrep National Awakening Movement (KHNAM) kala thalain tyngeh ia ka Khasi Hills Autonomous District Council (KHADC) namar ka jingbym lah ban pynkylla ia ka AD Rule 128, haba niew ia ka jingpynslem naduh u snem 2016 kum ka jingbym larkam ki Executive Committee bapher bapher.
Ha ka kyrwoh bala pynlait ha ka sngi Balang, u Working President ka KHNAM Bah Thomas Passah ula ong ba ka party kala aiti ia ki jingthoh sha u CEM ka KHADC naduh u Iaiong 2025 bad la buddien ruh bad une u CEM ba thymmai, hynrei ia ka Rule 128 ym shym la shimkhia satia.
Ula pynpaw ia ka jingsngewsih ba kiei kiba jia ha ri-lum Garo kim shym la pynlong ia ka KHADC ban leh eiei noh mardor.
U Bah Passah ula ong ba ka KHNAM ka khmih lynti ba ia ka amendment yn wanrah ha kane ka Dorbar ba dang iaid mynta. Hynrei, ka KHADC kala thaw pynban ia ka Committee ban shong bishar ia ka AD Rules baroh kawei, ka sienjam kaba u ong ba “kan shim ia ka por”.
Ka party kala iasaid ba ka jingpynkylla ia ka Rules 128 kan kham suk bad kham sted, lad aka Committee ka khmih pat hadien ia kiwei ki bynta jong ka Rules.
Kat kum ka jingong ka KHNAM, ka jingwanrah ia ka amendment kan ailad mynta ia ka Sorkar Jylla bad ia u Lat ba kin shimkhia ha kaban ai jingmynjur.
Haba ai ka jingmaham, u Bah Passah ula ong ba ka jingnang pynslem ka lah ban wanrah ia ka jingeh lada la bujli sa ia u Lat ka Jylla.
“Ka jingbahkhlieh kan long ia kane ka EC ba mynta jong ka KHADC kaba jied ban pynslem haba ka por ka dei kaba biang eh” ula kynthoh.
Ka KHNAM kala pynpaw ba ka Rule 128 kala sahteng bad ka KHADC naduh u snem 2016 bad kyntu ia ka Council ba kan leh eiei noh mardor ha ka jaka ban ap ia ka jingbishar ba pura ia ka AD Rules.
 kala thalain tyngeh ia ka Khasi Hills Autonomous District Council (KHADC) namar ka jingbym lah ban pynkylla ia ka AD Rule 128, haba niew ia ka jingpynslem naduh u snem 2016 kum ka jingbym larkam ki Executive Committee bapher bapher.){kind=link}