Shillong, Risaw 21 : Ki Pulit kila pynjur ia ka jingpahara ha kylleng ka nongbah Shillong hadien ki lai tylli ki jingjia kawang petrol bomb ba jia ha Keating Road, Kenchs Trace bad Laitumkhrah, bad pynkhlain bha ia ka jingiaid pahara miet ban khanglad ia kum kine ki jingjia.
U Deputy Commissioner ka East Khasi Hills, Abhilash Baranwal ula iathuh ba ym shym la don satia kano kano ka jingmyn saw ne jingjulor ki nongkynti ha kine ki jingjia. Ki Pulit kila shong bishar ia ki video CCTV ban lah pynithuh ia ki briew kiba donkti.
“Ki Pulit ki dang tohkit ia kine ki jingjia bad dang bishar ia ki video CCTV ban lum lang ia ki sakhi bad ithuh ia kiba donkti. Ia mynta, ym pat shym la iohkem iano iano ruh” ong u Baranwal.
U iathuh ba ka jingpynbeit ia ka bor pahara la nang pynkhlain lyngba ka jingbuh ia ki Pulit, magistrate ha kylleng ki jaka nalor ka jingpynkhlain ia ka jingiaid pahara miet, khamtam hadien ka miet shiteng synnia, namar kine ki jingjia ki ju jia ha ka por mynstep phyrngap.
Haba kyrpad ia ki nongshongshnong ba kin ym khuslai, u Baranwal ula kyntu ia ki jaidbynriew bapher bapher ba kin pynneh ia ka suk ka sain kum ki para nong shongshnong ka nongbah Shillong.
Ula ai ka jingkular ia ki paidbah ba ki bor district kila shim ia ki sienjam kiba donkam ban shim, ki ban khanglad ia kum kine ki jingjia ba kin jia biang bad ban pynneh ia ka suk ka sain ha nongbah.
