Iatehlok ka MRB bad ka GAMSME ban airam ia ki MSME ha ki jaka Nongkyndong

Shillong, Jylliew 17: Ka Meghalaya Rural Bank bad ka Global Association of MSMEs kila iasoi ia ka Memorandum of Understanding (MOU) ha ka sngi Balang, ban pynkhlain ia ka jingai ram ia ki karkhana rit, ki nongthain jingthain da ki kti bad ia ki Agri-Processors ha kylleng jong ka jylla.

Ia kane ka MoU la iasoi da u Chairman ka MRB u Ashish Yadav bad u Founder Chairman ka GAMSME u Abhijit Sharma. Kaba la kyrshan ha ka jingiaid lynti kaba la 24 snem bad ka jingdon nam jongka School of Livelihood and Rural Development, GAMSME kan iatreilang bad ka MRB ban wanrah ia ki nongseng kam na ki thain nongkyndong sha ki bynta jong ka jingdon ia ka jingiadei kam kaba jan bad ka Bank.

Kane ka jingiatreilang kan pyniasoh ia ki shnad jong ka MRB bad ka GAMSME ban poi sha ki shnong ki thaw ban weng ia ka jingdkoh jong ka jingiadei hapdeng ki Bank bad ki nongkhaii ki barit, ia kaba baroh shi katta la shu shaniah ha kata ka rukom jong ka jingiadei da kaba shim ia ka sut kaba heh na ka jingai ram.

Hapoh jong kane ka jingiateh kular, ka GAMSME kan buh ia ki kor ki bor jongka Digital Measurement, Reporting bad Verification ban khmih ia ka jingtreikam bad ia ka jinglong jingman ki karkhana barit.

Kine ki kor ki bor kin iarap ia ki nongseng kam ban pynwandur ia ka jingpyniaid ia ka pisa ka tyngka, ban khmih ia ka rukom treikam bad ka jingpyntyllun ia ka pisa pilain bad ban khmih ia ka jingpyndep ia ki kyndon kiba la buh hashwa ban shim ia ka ram, da kaba khate ia ka por bad ia ka jinglut jingsep jong ki Bank. Kane ka jingiatreilang ka kynthup ruh ia ka jingai jingpynsngewthuh ha kaba iadei bad ka jingpyndonkam ia ka pisa ka tyngka na ka bynta ki Self-Help Group bad ki karkhana kiba pyniaid hi da ka longiing.

Ka jingpynleit jingmut ka long ban pyniakhlad ia ka longiing na ka ioh ka kot ha ka khaii pateng, da kaba tei ia ka histori halor ka jingpynshisha ia ka jingshim ram bad ban pynkyklla ia ki SHG sha ki karkhana ki barit kiba la dep ban rejistar ban pynkhlain ia ka jingtreikam bad ia ka jinglah ban kyrda.

“Ka MRB kala iai bteng ban iengskhem ha kaban ai ram haduh ki jaka kiba khatduh kiba don ha kylleng jong ka jylla. Ryngkat bad ka GAMSME, ka Bank kan ialeh ban iaid shaphrang bad ban pynkhlain ia ka jingai jingshakri kaba salonsar ha ka jingai ia ka ram” la ong u Yadav haba soi ia ka Soskular.

Katba u Sharma ula ong “Ki nongthain jain, ki nongri ngap bad ki karkhana kiba rit kiba saindur ia ki marbam, iwei pa iwei napdeng jongki kidei kiba ap ba ka khaii pateng ka jong ki kan urlong, kila shah bat noh ha kata ka rukom treikam ka bym shim la lah satia ban iohi ia ki. Kane ka jingiatreilang ka ailad ia ki Bank ban iohi ia ki bad ban iarap ia ki ba kin ieng bad ki karkhana kiba lah ban leh ia ki kam khaii bad ki bank”.