Shillong, Jylliew 16 : U Myntri ka Ministry of Culture and Tourism Gajendra Singh Shekhawat ula pyntip ha ka sngi Ba-ar ba “Palat T.6 lak klur lah kynshew ha ka thain Shatei Lam Mihngi naduh u snem 2014” katba ka Sorkar Pdeng ka dang kyntur ban pynkylla ia ka thain kum ka jaka pdeng na ka bynta ki lad pyniasoh, ka khaii pateng, ki kam jngohkai bad ka jingkynshew kam.
Haba kren ha ka jingialang pynwai jong ka North East India Infrastructure Summit & Exhibition 2026, u Shekhawat ula ong ba ki jingkynshew pisa ki kyntup naduh ki surok Highway, ki lynti rel, ki kad liengsuin, ki lynti na Um, ki digital network bad ki project pynmih bording.
Ula ban jur ba ki jingpynroi ia ki jingtei “ki iaid palat na ka jingshna surok bad jingkieng, hynrei ban shakri kum ka lad ban pyniasoh ia ki briew bad ki kabu, ki jingshakri bad ki iew”.
U Myntri ula pynpaw ruh ia ka bynta ba kongsan jong ka thain Shatei Lam Mihngi kum ka “khyrdop ka India sha Southeast Asia” bad ong ba ka jingkwah ki nongkynshew kam ha ryngkat bad ka “jingdon kyrhai ki lad ha ka kam jngohkai” hapoh ka thain, kala nang kiew nalor kane ka jingpynlut kaba mynta.
Haba khot ia ka jingkiew ha ka roi ka par kaba neh, u Shekhawat ula ong ba ka roi ka par ka dei ban pynleit jingmut ha ka “jingpynbiang tarajur ia ka jingkiew ka ioh ka kot bad ka jingpynneh ia ka mariang bad ia ka riti dustur”.
Ka NEIINFRA summit, bala pynlong da ka Sorkar Meghalaay bad la pyniaid da ka Federation of Industry & Commerce of North Eastern Region (FINER) lem bad ka Build India Foundation, kala wanrah lang ia ki nongthaw policy, ki nongialam na ki karkhana bapher bapher, ki nongkynshew kam bad ki riewshemphang ban iakren halor ki jingdonkam kiba hakhmat eh jong ka thain Shatei Lam Mihngi.
Kane ka summit ba ar sngi kala kut noh ha ka sngi Ba-ar hadien ka jingiakren halor ka jingiatehlok, ka jingkynshew kam bad ka roi ka par kaba neh ha ka thain baroh kawei.
