Shillong, Jylliew 16 : Ka jingtheh pisa ka Meghalaya ba kot T.1,800 klur sha ki jingtei ia ki madan ialehkai kala shim ia ka bynta ba shakhmat eh ha ka sngi Ba-ar haba pynkut ia ka Meghalaya Sports Conclave 2026, haba pynpaw shai ba ki Stadium, ki madan Indoor bad ki rukom pynroi ia ki sap la tei ban neh palat ia ka 39th National Games ha u 2027.
Ia kane ka Conclave ba la pynlong da ka Tnad Sports & Youth Affairs, kala wanrah lang ia ki nongialehkai ba ioh khur takma na ki Olympics, ki nongialehkai, ki nongthaw policy bad ki riewshemphang ha ki kam ialehkai ba kin iakren halor ka rukom pyniaid kam, ka jingpynkylla lyngba ki kor digital bad ka jingpynroi ia ka sap ki nongialehkai.
Hynrei ka jingbun jong ka jingkynshew pisa kala mih kum ka khubor ba kongsan jong ka sngi.
Ki video kiba la pyni ki la pynpaw kumno ka Meghalaya kala pynwandur thymmai ïa ka rukom shimkhia ia ki kam ïalehkai da ki projek kiba heh.
Ki Heh Ophisar ki pyntip ba ka jingkynshew ha ka jingtei ia ki madan ialehkai kala kot mynta ia ka T.1,800 klur. Ka Integrated Multipurpose Indoor Sports Compex ba T.132 klur, kaba dang shu plie shen, kana dei ka jaka ialehkai ba thymmai na ka bynta ki jingialehkai hapoh Iing.
Ka jingtrei pynbha ia ka JN Sports Complex bad PA Sangma Integrated Sports Complex ki dang iaid shaid shaid mynta, ban kyntiew kyrdan ia ki jaka kilan met bad ki jingialehkai. Ka Mawkhanu Football Stadium ba T.732 klur, kaba pynwandur kum ka Football Stadium ba nyngkong eh ka India kaba la tei kat kum ki kyndon ka FIFA bad AFC, ka ban don 40,000 ki jaka shong, la buh ba kan long ka jaka ba hapdeng eh na ki jingpynroi ka Jylla ia ki jingtei.
Ka jingialang ba nyngkong eh halor ka jingpynkylla ia ka rukom pyniaid ia ki kam ialehkai ha India la iashimbynta ruh da ka nongialehkai ba ioh takma ha ka Olympic ka Manu Bhaker bad PR Sreejesh nalor ki stad pyniaid kam.
Ki nongkren kila ban jur ba ki policy ki dei ban iaid palat ia ki nongialehkai kiba paw bad ban wanrah ia ka rukom treikam kaba kdup lang ia baroh ki nongshongshnong.
Ka jingialang ba-ar halor ka Innovation and Digital Transformation in Sport, kala khmih ba kumno ki technology bad ki jing bishar ia ki jingkhein jingdiah, kila pynkylla dur ia ka rukom khmih bniah ia ki rukom ialehkai.
U Vice President ka World Athletics Dr Adille Sumariwalla, ka dkhot ka Go Sports Foundation Deepthi Bopaiah, Olympic champion Abhinav Bindra bad nongseng ka RevSportz Boria Majumdar kila iashimbynta lang ha ka jingiakren.
Mynta ba ka National Games kala sah satang shisnem duna, ka conclave kala pynkut da kaba pynskhem biang ia ka jingthmu jong ka Meghalaya ban pynkylla ia ki jingtei ba T.1,800 klur sha ka jingsah nam kaban neh shirta.
