Shillong, Jylliew 12: Ka Meghalaya Football Association ha ka sngi Thohdieng, kala pynkup burom ia ki arngut ki thei ialehkai ka Jylla-ka samla Sanfida Nongrum bad Ribansi Jamu, kiba don ha ka kynhun ialehkai ka Ri India, kaba ioh ban rah ia ka nam Champion jong ka SAFF Women’s Championship 2026.
Ia kane ka jingpynkup burom la pynlong ha madan phutbol ka MFA ha Polo.
Ka India ka la pynliem ia ka Bangladesh ha ka Final kaba long ha ka 6 tarik Jylliew ha Goa ban long ka Champion jong ka SAFF Women’s Championship, kaba la wan hadien 7 snem ba ki thei ialehkai ka India lane Blue Tigresses ki la ioh ia kane ka nam.
Ka Sanfida, kaba la mih madan nyngkong eh iaka India mynta u snem, ka la thep kol ha ka final bad kumjuh ruh ha ka Semifinal, bad kala shah jied ruh kum ka Most Valuable Player (MVP) jong ka lympung.
Ka samla Ribansi kaba dei ka nongapkol, ka la mih madan nyngkong eh iaka India haka jingïalehkai pyrshah iaka Maldives.
Ki Nongialam ka MFA kynthup ia u President Bah Hamletson Dohling, u Vice President Bah Cliff Nongrum, Treasurer Prosper Warjri, Executive Member Freddy Kharpran bad Chairperson ka Women’s Committee Dipshon Ryntathiang nalor kiwei kiwei, kila don iadonlang ban pdiang sngewbha ia kine ki arngut ki thei ialehkai kiba wanrah nam iaka Ri bad iaka Jylla.
Hapoh ka prokram jong ka MFA ba sdang pyntreikam ha u snem ba la dep, ki nongialehkai kiba mihkhmat ia ka India ha ka kyrdan ba kham heh kin ioh ia ka buskit song pisa ba mar T.50,000. Ia kane ka pisa yn sa aiti sha ka Sanfida bad Ribansi ha ka jingialang ban sa pynlong kyrpang. Ia mynta, la aiti shuwa ia ka song pisa, ka shawl bad mementos sha kine ki arngut ki thei ialehkai ba nyngkong eh na ka jylla ban mihkhmat iaka India.
Haba kren ha kane ka jingïalang, u Bah Hamlet Dohling u la ong ba kine ki arngut kin nym lah ban poi sha ka kynhun ïalehkai ka India khlem ka jingtrei shitom bad ka jingaiti lut. “Ka Meghalaya ka iaryngkat bad kiwei ki jylla bad kine ki ar ngut ki la pynshisha. Ngi khmih lynti shuh shuh na ki ha ki por ban wan,” u la ong.
Ka samla Sanfida, kaba la ioh thep kol tang haka minit ba hynniew ha ka jingïalehkai ba nyngkong eh jong ka ia ka ri India ha ka AFC Women’s Asian Cup 2026 ha Australia, ka la kyntu ïa kiwei pat ki nongïalehkai kynthei ba ki dei ban trei shitom, long kiba ïaishah bad pynleit jingmut ha ki thong jong ki.
Ka samla Ribansi kaba kiew kyrdan naka kynhun U-20 jong ka India sha ka Senior Team ka la ong ba ki don shibun ki jingeh hynrei ka long kaba sngewtynnad shibun ban jop ha ka jingïalehkai ba nyngkong jong ka ha ka kynhun senior.
Baroh arngut ki kwah eh ban pynleit jingmut shwa hapoh ka Jylla hashuwa ban shah khot biang ban mihkhmat iaka Ri ne iaki Club ba ki don.
Ha ka jingialang la don arngut ki nong Meghalaya kiba la ialehkai ruh ha ka kynhun ialehkai U-20 bad U-17 jong ka India, ka Fragrancy Riwan bad ka Alisha Lyngdoh.
Kum ka jingialehkai football jong ki shynrang, ka jingialehkai phutbol jong ki kynthei ha Meghalaya kala nang kiew shaphrang bad baroh arngut kata ka Sanfida bad ka Ribansi ki don ha khmat eh ban pynshlur ia ki khynnah kynthei ban ia shim bynta haka football.
