Thmu ka Sorkar ban pynbeit ia ka kynrum kynram sam bording ha Mawsynram khlem da pynkhein hukum Iingkashari : Metbah

Shillong, Jylliew 05 : Ka Sorkar Jylla kan shim ia ka sienjam ban pynbeit ia ki jingud jingnam jong ki paidbah ka Mawsynram Sub-Division ba iadei bad ka jingai sam bording ha ka kompani (franchisee), hynrei kan leh phikir bha ia ka kam namar ka jingdon ka mukotduma ha Iingkashari, ong u Myntri kam bording Bah Metbah Lyngdoh ha ka sngi Thohdieng.

U Bah Metbah ula ong ba ka jingpynleit jingmutjong ka Sorkar ka long halor ka jingpynbha ia ka jingai jingshakri, hynrei ki jingeh kila mih ha kane ka rukom pyniaid ba mynta.

“Ka jingthmu hi ka long ban don ia ka rukom ai jingshakri kaba biang khnang ban pynthikna ia ka jingai jingshakri ba kham bha sha u paidbah ka Jylla, Hynrei ha ka jingiaid ka kam, katto katne ki jingeh kila mih” ula ong.

“Ngi la iashong jingialang bad ka Tnad lem bad ka Corporation bad ngi la iakren ia baroh king ki jingeh bala pynsngew da ki seng bapher bapher” ula bynrap.

U Bah Metbah u pyntip ba ki MLA kynthup u MLA ka Mawsynram Bah Olen Sing Suin, MLA ka Ranikor Bah Pius Marwein bad MLA ka Mawphlang Bah Beyondstar Kurbah kila iakynduh ia u haduh arsien kynthoh ban pynsngew ia ki jingud jingnam jong u paidbah.

“Kila iakynduh ia nga la arsnem bad pynsngew ia ka jingsngewkhia ki nongthang ding kiba la mad jingeh na ka por sha ka por ha ka rukom ioh bill, ka jingpynlip bording bad ki jingshakri bapher bapher kiba dei ban ai” ong u bah Metbah haba iathuh “Ka rai ia kane ka kam kala dei ban mih la katto katne bnai mynshuwa, hynrei la pynkynriah namar ka jingdon ka mukotduma hapoh ka Iingkashari High Court”.

“Ngi la dei ban shim rai naduh ki bnai bala leit, hynrei namar kane ka kam ka don ha Iingkashari High Court, ngi la hap ban leh husiar bha. Kano kano ka rai ba shim da ka Sorkar kam dei ban iaid pyrshah ia ka kam kaba la tian bishar hapoh ka Iingkashari” ula ong.

U Bah Metbah u pyntip ba u Myntri Rangbah ka Jylla Conrad K Sangma ula ai ka jingbthah ia u ba un pyniaid beit shakhmat ia ka kam.

“Namar ngi sngewthuh ia ka jingheh jong ka jingeh bala mad da ki nongthang bording katei ka thain, nga la iakynduh biang ia u Myntri Rangbah bad pyntip ha u ia baroh ki jingsngewkhia. Ula ong ia nga “Sngewbha khmih ia kane ka kam bad pyniaid beit shakhmat bad kano kano ka rai kaba donkam ban shim. Kane ka dei kaba ula bynshet ha nga” ong u Myntri.

“Halor kane, nga la bthah ia ka Tnad ban peit ia kaei kaba ngi lah ban leh ban pynthikna ba ka Corporation kan ym ktah ia kam ba don bad ka Iingkashari” ula bynrap.

Ki paidbah ka Mawsynram sub-division kila ujor la bunsiem ia ka jingthurmur ka rukom sam bill, ka jingpynlip bording khari khari bad ka jingbym biang ka rukom ai jingshakri jong ka kompani SAI.